काठमाडौँ, पुस ८ गते । इङ्लिस प्रिमियर लिग क्लब लिभरपुल, चेल्सी र टोट्टनहाम कारबाओ कपको सेमिफाइनलमा प्रवेश गरेका छन् । बुधबार राति भएको खेलमा लिभरपुलले लेस्टर सिटीलाई टाइब्रेकरमा ५–४ गोलले हरायो ।
निर्धारित समयको खेल ३–३ गोलको बराबरी भएपछि खेल टाइब्रेकरमा पुगेको थियो । लिभरपुलले दुई गोलको अग्रता उल्टाएर बराबरी गरेको थियो । निर्धारित समयमा लेस्टरका जेमी भार्डीले दुई तथा जेम्स म्याडिसनले एक गोल गर्नुभयो । लिभरपुलका एलेक्स चेम्बरलिन, डिएगो जोटा र टाकुमी मिनामिनोले गोल गर्नुभएको थियो ।
टाइब्रेकरमा लिभरपुलका जेम्स मिलर, रोबर्टो फिर्मिन्हो, एलेक्स चेम्बरलिन, नेवी केइटा र डिएगो जोटाले गोल गर्नुभयो । ताकुमी मिनामिनोको प्रहार क्रसबारमा लाग्दै बाहिरिएको थियो । लेस्टरका युरी टिलेमान्स, जेम्स म्याडिसन, मार्क अल्ब्राइटन र केलिची इहानेचोले गोल गर्नुभयो । लुकी थोमस र रायन बट्रान्डको प्रहारलाई लिभरपुलका गोलरक्षक काओइहिम केलहरले बचाउनुभयो ।
यसैगरी चेल्सीले घरेलु टोली ब्रेन्टफर्डलाई २–० गोलले हरायो । चेल्सीको जितमा जर्गिन्होले पेनाल्टीमार्फत गो गर्नुभयो । चेल्सीले अर्को गोल आत्मघाती उपहार पाएको थियो । अर्को खेलमा टोट्टनहामले वेस्ट हाम युनाइटेडलाई २–१ गोलले हराउँदै अन्तिम चारमा स्थान बनायो । टोट्टनहामको जितमा स्टेभन वर्गवाइन र लुकास मौउराले गोल गर्नुभयो । वेस्ट हामका जरोड वोवेनले एक गोल फर्काउनुभयो । एजेन्सी
