काठमडौँ, पुस १३ गते । इङ्लिस प्रिमियर लिग फुटबलमा म्यानचेस्टर युनाइटेड रेलिगेसनको दबाबमा रहेको न्युक्यासल युनाइटेडसँग बराबरीमा रोकिएको छ । सोमबार राति भएको खेलमा युनाइटेडले न्युक्यासलसँग उसैको मैदानमा १–१ गोलको बराबरी खेल्दै अंक बाँडेको हो ।
न्युक्यासलका लागि एलान सेन्ट म्याक्सिमिनले गोल गर्नुभयो । युनाइटेडका इडिन्सन काभानीले बराबरी गोल फर्काउनुभयो । न्युक्यासलले सातौँ मिनेटमै एलान सेन्ट म्याक्सिमिनको गोलबाट सुवाती अग्रता लिएपनि जोगाउन सकेन । ७१औँ मिनेटमा इडिन्सन काभानीले गोल गर्दै युनाइटेडलाई हारबाट बचाउनुभएको थियो ।
बराबरी खेलेपछि युनाइटेडले पाँचौँ स्थानमा उक्लने मौका गुमायो । १७ खेलबाट २८ अंक बनाएको युनाइटेड सातौँ स्थानमा छ । ११ अंक बनाएको न्युक्यासल रेलिगेसनको चपेटामा छ । १९ खेल सकेको क्युक्यासल १९औँ नै स्थानमा छ ।
शीर्षस्थानमा रहेको म्यानचेस्टर सिटीको ४७ अंक छ । दोस्रो स्थानमा रहेको लिभरपुल र तेस्रो स्थानमा रहेको चेल्सीको समान ४१ अंक छ । एजेन्सी
