काठमाडौँ, फाल्गुन ३ गते । शहिद स्मारक ‘ए’ डिभिजन लिगमा जावलाखेल युथ क्लब र फ्रेन्ड्स क्लबले बराबरी खेल्दै अंक बाँडेका छन् । एन्फा कम्प्लेक्स मैदान सातदोवाटोमा मंगलबार भएको खेलमा जावलाखेल र फ्रेन्ड्स ३–३ गोलको बराबरीमा रोकिएको हो । ललितपुर डर्वीमा सुरुवातमा तीन गोलले पछि परेको फ्रेन्ड्सले उत्कृष्ट पूनरागमन गर्दै खेल बराबरीमा सकेको हो ।
जावलाखेलका लागि लोईक एन्जीमी कोउहिमले दुई गोल गर्नुभयो । अर्को गोल रुपबहादुर लामाले गर्नुभयो । फ्रेन्ड्सका जमउल एन्थोनी फ्रान्सिओसले दुई तथा नाथनियल जुड ग्रासियाले एक गोल गर्नुभएको थियो । बराबरीसँगै ११ खेलबाट १० अंक बनाएको जावलाखेल ११औँ स्थानमा छ । समान खेलबाट सात अंक बनाएको फ्रेन्ड्स १२औँ स्थानमा छ ।
दशरथ रंगशालामा मंगलबार नै भएको अर्को खेलमा ब्रिगेड ब्वाइज र च्यासल क्लबले गोलरहित बराबरी खेल्दै अंक बाँडेको छ । रेलिगेसनको दबाबमा रहेका दुवै टोलीले गोल गर्ने राम्रा अवसर गुमाएका थिए । बराबरीसँगै ११ खेलबाट सात अंक बनाएको ब्रिगेड १३औँ र ६ अंक बनाएको च्यासल १४औँ स्थानमा छ ।
