काठमाडौँ, फाल्गुन १२ गते । युइएफए च्याम्पियन्स लिग अन्तर्गत अन्तिम १६ को पहिलो लेगमा स्पेनिस क्लब एट्लेटिको म्याड्रिड र इङ्लिस क्लब म्यानचेस्टर युनाइटेडले बराबरी खेलेका छन् । घरेलु मैदानमा बुधबार राति भएको खेलमा एट्लेटिको युनाइटेडसँग १–१ गोलको बराबरीमा रोकिएको हो ।
एट्लेटिकोका जोआओ फेलिक्सले गोल गर्नुभयो । युनाइटेडका एन्थोनी इलांगाले बराबरी गोल फर्काउनुभयो । एट्लेटिकोले सुरुवाती अग्रता लिएपनि जोगाउन सकेन । सातौँ मिनेटमै जोआलो फेलिक्सले गोल गर्दै एट्लेटिकोलाई अग्रता दिलाउनुभएको थियो । ८०औँ मिनेटमा एन्थोनी इलांगाले गोल गर्दै खेललाई १–१ गोलको बराबरीमा ल्याउनुभयो । त्यसपछि थप गोल नहुँदा खेल बराबरीमा सकियो । बराबरीसँगै दुवै टोलीले अघिल्लो चरणमा पुग्ने सम्भावना कायम राखेका छन् । दोस्रो लेग मार्च १५ तारिख युनाइटेडको मैदानमा हुनेछ ।
अर्को खेलमा पोर्चुगिज क्लब बेन्फिका र डच क्लब आयाक्सले २–२ गोलको बराबरी खेले । बेन्फिकाको मैदानमा घरेलु टोलीका लागि रोमन यारेमचुकले गोल गर्नुभयो । बेन्फिकाले अकोृ गोल आयाक्सबाट उपहार पाएको थियो । आयाक्सका डुसान टाडिक र सेवास्टिन हालेरले गोल गर्नुभयो । दुई टोलीबीचको दोस्रो लेग मार्च १५ तारिख आयाक्सको मैदानमा हुनेछ । एजेन्सी
