काठमाडौँ, फागुन १९ गते । चर्च ब्वाइज क्लबले शहीद स्मारक ‘बी’ डिभिजन लिगमा विजयी सुरुवात गरेको छ । ललितपुर सातदोबाटोस्थित एन्फा कप्लेक्समा बिहीबार भएको खेलमा चर्च ब्वाइजले टुसाल युथ क्लबलाई ५–२ गोलले हरायो । चर्च ब्वाइजको जितमा आशिष चापागाईले ह्याट्रिक गर्नुभयो । बिकास राई र कुवेर न्यौपानेले एक एक गोल गर्नुभयो ।
टुसालका गिलेप्सी जंग कार्की र उत्तम शाहीले गोल गर्नुभएको थियो । पहिलो जितसँगै चर्च ब्वाइजले तीन अंक बनाएको छ । टुसालले हारबाट खेलको सुरुवात गरेको छ । अर्को खेलमा श्रीकुमारी क्लब र नयाँ बस्ती युथ क्लबले २–२ गोलको बराबरी खेल्दै अंक बाँडेका छन् । नयाँ बस्तीका लागि अभय धिमाल र सुमनले गोल गर्नुभयो । श्रीकुमारीका सृजलराज गौतम र नीरबहादुर आलेले गोल गर्नुभयो ।
बराबरीसँगै दुवै टोलीले एक एक अंक बाँडेका छन् । चैत २७ गतेसम्म सञ्चालन हुने लिगमा १४ टोलीले सिंगल राउन्ड रोविनको आधारमा प्रतिस्पर्धा गर्नेछन् । लिगको शीर्ष दुई टोली ‘ए’ डिभिजनमा बढुवा र अन्तिममा रहने दुई टोली ‘सी’ डिभिजनमा घटुवा हुनेछन् ।
