नवराज कट्टेल
विराटनगर, साउन १२ गते। कोशी अस्पताल विराटनगरको पोस्टनेटल वार्डमा कार्यरत नर्समा कोरोना भाइरस (कोभिड–१९) पोजेटिभ देखिएपछि उक्त वार्ड सिल गरिएको छ ।
विराट अस्पतालका चिकित्सकलाई कोरोना सङ्क्रमण पुष्टि भएपछि त्यहाँको ‘ओटी’ विभागमा कार्यरत नर्ससमेत सङ्क्रमित हुनुभएकाे हाे । उहाँ कोसीसँगै विराटमा समेत आंशिक कार्यरत रहुनभएकाे थियाे । उहाँसँगै विराटका चारजना नर्सहरूमा कोरोना सङ्क्रमण पोजिटिभ आएको विराटनगर महानगरपालिकाको जनस्वास्थ्य विभागले जानकारी दिइएको छ ।
कोशीको पोस्टनेटल वार्डमा उहाँलाई आइतबार कोरोना सङ्क्रमण पुष्टि भएको हो । त्यसपछि कोसीको उक्त वार्ड सिल गरिएको छ । कोशी असपतालमा हाजिर हुन आएका सप्तरीका अर्का चिकित्सकलाई समेत शनिबार कोरोना पोजिटिभ देखिएको थियो ।
कोशी अस्पतालका मेडिकल सुपरिटेण्डेन्ट (मेसु) डा. चुमनलाल दासले अस्पतालमा कार्यरत नर्समा कोरोना सङ्क्रमण पोजिटिभ देखिएसँगै वार्ड सिल गरिएको जानकारी दिनुभयो । कोशीले उक्त वार्ड सिलसँगै नर्सको सम्पर्कमा रहेकाहरूको पहिचान गरि स्वाब सङ्कलनको काम सुरु गरेको मेसु दासले जानकारी दिनुभयो । यसअघि सङ्क्रमित चिकित्सक तथा आइतबार सङ्क्रमण पुष्टि हुनुभएकाे नर्सलाई अस्पताल भर्ना गरिसकिएको छ ।
