मधुसुधन तिमल्सिना
काभ्रे, भदौ २ गते । धुलिखेल अस्पतालमा एक कोरोना सङ्क्रमितको मृत्यु भएको छ । मङ्गलबार बिहान धुलिखेल नगरपालिका वडा न ६ का ९८ वर्षीय पुरुषकाे उपचारको क्रममा मृत्यु भएका अस्पतालले जनाएको छ । उहाँमा कोरोना सङ्क्रमण पुष्टि भएपछि साउन २६ गते धुलिखेल अस्पतालमा भर्ना गरिएको थियो । उहाँलाई स्वासप्रश्वास, छाती तथा घाँटीको समस्या रहेको थियो ।
वृद्धावस्था रहेकाले रोग प्रतिरोधात्मक क्षमता कमजोर रहेपछि अस्पतालले प्लाज्मा थेरापीबाट उपचार गर्न पर्ने डाक्टरको सुझाव थियो । तर समय मै ‘ए’ प्लस पोजिटिभ रगत नपाएको परिवारले जनाएको छ । प्लाज्मा थेरापीका लागि सङ्क्रमण भएर निको भएका जुन समूहको बिरामी हो, त्यससँगै मिल्ने समूहको रगत आवश्यक पर्ने अस्पतालले जनाएको छ । उहाँमा कोरोना पोजिटिभ देखिएलगत्तै उहाँसँगै बस्ने बुहारी र छोरामा कोरोना पुष्टि भएको छ । उहाँहरू दुवै जना काठमाडौँमा उपचाररत हुनुहुन्छ । परिवारका अन्य सदस्यहरूको पनि कोरोना परीक्षण भइरहेको छ ।
उहाँको शव पशुपतिको विद्युतीय शवदाह गृहमा अन्त्येष्टि गरिने बताइएको छ ।
स्वास्थ्य कार्यालय, काभ्रेका वरिष्ठ स्वास्थ्य प्रशासक डा. नरेन्द्रकुमार झाले कोरोनाका कारण काभ्रेका दुई जनाको मृत्यु भएको जानकारी दिनुभयो । यसअघि पाँचखाल नगरपालिका वडा नं. १ घर भएकी ५० वर्षीया महिलाको कोरोनाकै कारण साउन २६ गते किस्ट अस्पताल काठमाडौँमा निधन भएको थियो । उहाँका अनुसार काभ्रेमा सङ्क्रमितको सङ्ख्या ८० पुगेको छ । त्यस्तै, ३४ जना उपचारपछि घर फर्किएको र बाँकी उपचाररत रहेको झाले जानकारी दिनुभयो ।
२०८१ मंसिर १२ बुधवार
