केशवराज पौडेल
काठमाडौं, कात्र्तिक २४ गते । नेपालमा ८२ जना कोरोना संक्रमितमा गम्भीर स्वास्थ्य समस्या देखिएपछि भेन्टिलेटरमा राखेर उपचार भैरहेको छ । आईसीयूमा राखेर ३९८ जनाको उपचार भैरहेको छ । आइतबार नेपालमा कोरोना संक्रमित भएर होम आइसोलेशनमा बस्नेहरुको संख्या २९ हजार १९७ छ । काठमाडौं उपत्यकामा अस्पतालहरुमा कोरोना संक्रमितको चाप निक्कै धेरै छ भने उपत्यका बाहिरका जिल्लाका अस्पताहरुमा समेत संक्रमितको संख्या बढ्दै छ । बाहिरी जिल्लाहरुमा अस्पतालमा सामान्यदेखि भेन्टिलेटरहरुको संख्या सन्तोषजनक नै छ । संस्थागत आइसोलेशन तथा भएका अस्पतालहरुमा अक्सिजन लगायत अत्यावश्यक सामाग्रीको व्यवस्थापनमा सरकारी तथा गैरसरकारी निकायले निक्कै सकृयता देखाएका छन् ।
कोरोना संक्रमणबाट सबैभन्दा धेरै प्रभावित भएको बागमती प्रदेशको काठमाडौं, ललिलपुर र भक्तपुरमा रहेका अस्पतालहरुमा कोरोना संक्रमितको चाप अत्याधिक छ भने बाहिरी जिल्लाहरुमा रहेका अस्पतालमा चाप क्रमशः बढ्न थालेको छ ।
स्वास्थ्य तथा जनसंख्या मन्त्रालयका सह–प्रवक्ता डा. समीरकुमार अधिकारी काठमाडौं उपत्यकाका अस्पतालमा संक्रमितको चाप बढिरहेको बताउनुहुन्छ ।
जुन जिल्लामा सकृय संक्रमितहरुको सख्या पाँच सयभन्दा धेरै छ त्यो जिल्लामा रहेका अस्पतालहरुमा बिरामीको चाप छ । धेरै संक्रमित भएको जिल्लामा होम आइसोलेशन तथा संस्थागत आइसोलेशनमा बस्नेहरुको संख्या समेत धेरै रहेकाले आईसीय तथा भेन्टिेलेटरमा राखेर उपचार गर्नुपर्ने र अक्सिजन दिनुपर्ने बिरामी मात्रै अस्पताल आउनुभएको छ । नेपालमा ३५ हजार ४१९ आइसोलेशनमा रहेकोमध्ये २९ हजार १९७ जना होम आइसोलेशनमै हुनुहुन्छ । काठमाडौं उपत्यकामा काठमाडौमा ११ हजार ६३८ जना होमआइसोलेशनमा हुनुहुन्छ । त्यस्तै, काठमाडौमा ५६ हजार २७३ जनाले कोरोनालाई परास्त गर्नुभएको छ । काठमाडौमा कोरोनाको कारण २७२ जनाको मृत्यु भैसकेको छ । ललितपुरमा होम आइसोलेशनमा एक हजार ८०३ जना हुनुहुन्छ । भक्तपुर होम आइसोलेशनमा एक हजार ७५२ जना हुनुहुन्छ ।
अहिले नेपालका झापा,मोरङ,सुनसरी,काठमाडौै, भक्तपुर, ललितपुर, चितवन, काभ्रे, कास्की, नवलपरासी पूर्व, दाङ र रुपन्देहीमा सकृय सक्रमितको संख्या पाँच सयभन्दा धेरै छ । त्यस जिल्लामा रहेका अस्पतालहरुमा संक्रमितको चाप छ । अरु धेरै जिल्लामा सामान्य बेडमा राखेर र होम आइसोलेशनमा राखिएर संक्रमितको उपचार भैरहेको छ ।
आइतबार साँझसम्म नेपालमा २९ हजार १९७ जना कोरोना संक्रमित होम आइसोलेशनमा छन् । त्योमध्ये प्रदेश नं १ मा चार हजार ५९८, प्रदेश २ मा ९८५, बागमती प्रदेशमा अठार हजार ८६८, गण्डकी प्रदेशमा एक हजार ७१०, लुम्बिनी प्रदेशमा दुई हजार ७५, कर्णाली प्रदेशमा ३०७ र सुदुरपश्चिम प्रदेशमा ६५४ जना संक्रमित होम आइसोलेशनमा छन् ।
पछिल्लो समय अस्पतालमा जानेभन्दा पनि घरमै आइसोलशन बनाएर बस्नेहरुको संख्या बढेको मन्त्रालयले जनाएको छ । सातवटै प्रदेशमा आईसीयमा रहेर उपचार गराउने संक्रमितको संख्या ३९८ छ । त्योमध्ये सबैभन्दा धेरै आइसीयूमा राखेर उपचार बागमती प्रदेशमा भैरहेको छ । यो प्रदेशमा १८० जनाको आइसीयूमा राखेर उपचार भैरहेको छ । सबैभन्दा कम कर्णाली प्रदेशमा पाँच जना संक्रमितको आईसीयमा राखेर उपचार भैरहेको छ । भेन्टिलेटरमा राखेर उपचार गराउने संक्रमितको सख्या ८२ रहेकोमा बागमती प्रदेशको संख्यामात्रै ४१ छ ।
