.jpg)
सिराज खान
नेपालगञ्ज, चैत ३० गते । टाइफाइड रोगको उच्च जोखिममा रहेको बाँके जिल्लामा १५ महिनादेखि १५ वर्ष उमेर समुहका ९९ प्रतिशत बालबालिकालाई टाइफाइडविरुद्धको खोप लगाइएको छ । जिल्लामा चैत २३ गतेदेखि शुरु गरिएको टाइफाइडविरुद्धको खोप लगाउने अभियान अन्तर्गत हालसम्म ९९.३ प्रतिशत बालबालिकालाई सो खोप लगाइएको बाँकेका खोप फोकल पर्सन नरेश श्रेष्ठले बताउनुभयो ।
खोप फोकल पर्सन श्रेष्ठका अनुसार जिल्लाका १५ महिनादेखि १५ वर्ष उमेर समूहका १ लाख ४८ हजार ९३३ जना बालबालिकालाई टाइफाइडविरुद्धको खोप लगाउने लक्ष्य रहेकोमा हालसम्म १ लाख ४७ हजार ४९१ जनालाई खोप लगाइएको छ । बाँके जिल्ला टाइफाइडको उच्च जोखिममा रहेकाले जोडतोडका साथ सो अभियान सञ्चालन गरिएको जनाउँदै खोप फोकल पर्सन श्रेष्ठले त्यसका लागि सबैको उल्लेखनीय सहयोग प्राप्त भएको बताउनुभयो । सो अन्तर्गत जिल्लाका ८१ वटै वडामा विद्यालय तथा स्वास्थ्य संस्थामा २६४ वटा खोप केन्द्र राखेर खोप लगाउने कार्य गरिएको छ ।
स्वास्थ्य कार्यालयका अनुसार खोप लगाउने बालबालिकामा सबैभन्दा बढी कोहलपुरमा छन् । कोहलपुरमा लक्ष्यभन्दा बढी १३७ प्रतिशत बालबालिकाले खोप लगाएका छन् । कोहलपुरमा २० हजार १४२ जना बालबालिकालाई खोप दिने लक्ष्य रहेकोमा २७ हजार ६६२ जनाले खोप लगाएको खोप फोकलपर्सन श्रेष्ठले बताउनुभयो ।
यसैगरी बैजनाथ गाउँपालिकामा ११५ प्रतिशतले सो खोप लगाएका छन् । सो पालिकामा १६ हजार २९० जनालाई खोप दिने लक्ष्य रहेकोमा १८ हजार ८२४ जनाले खोप लगाएका छन् । श्रेष्ठकाअनुसार सबैभन्दा कम खोप लगाउनेमा नरैनापुरका बालबालिका छन् । सो पालिकाका ८० प्रतिशत बालबालिकाले खोप लगाएका छन् । नरैनापुरमा १२ हजार ५२७ जना बालबालिकालाई खोप लगाउने लक्ष्य रहेकोमा १० हजार ११८ जनाले खोप लगाएका छन् ।
हालसम्म खोप लगाउनेमा १५ महिनादेखि २३ महिनासम्मका ५ हजार ४११ बालबालिकाले र २ वर्षदेखि १५ वर्षसम्मका १ लाख ४२ हजार ८० जना रहेको स्वास्थ्य कार्यालय बाँकेले जनाएको छ । खोप अभियानमा विद्यालय र अभिभावकको उत्साहपूर्ण सहभागिता रहेकाले अभियान सफल भएको स्वास्थ्य कार्यालय बाँकेका प्रमुख धिरजंग शाहले बताउनुभयो ।
