बेलहिया नाकाबाट ३५७ भित्रिए, ७४४ बाहिरिए

रुपन्देहीको बेलहिया नाका भएर बिहीबार ३५७ जना नेपाली नेपाल भित्रिएका छन् । इलाका प्रहरी कार्यालय, बेलहियाका अनुसार बेलहिया नाकाबाट बिहीबार मात्रै ७४४ भारतीयहरू भारत प्रस्थान गरेका छन् । भारत प्रवेश गर्नेहरूको सङ्ख्या अघिल्ला दिनहरूको तुलनामा घटेको प्रहरीको भनाइ छ ।

नेपाल-भारत सीमा सम्बन्धको प्रमाण सङ्कलन गर्न नौ सदस्यीय विज्ञ समूह गठन

सरकारले नेपाल भारत सीमा सम्बन्धको प्रमाण सङ्कलन गर्न अनुसन्धान प्रतिष्ठानका अध्यक्ष विष्णुराज उप्रेतीको संयोजकत्वमा नौ सदस्यीय विज्ञ समूह गठन गरेको छ । बुधबार बसेको मन्त्रिपरिषद् बैठकबारे बिहीबार आयोजित पत्रकार सम्मेलनमा विज्ञ समूह गठन गरेको सरकारका प्रवक्ता तथा अर्थ, सञ्चार तथा सूचना प्रविधि मन्त्री युवराज खतिवडाले जानकारी दिनुभयाे ।

कर्णालीमा थप ५५ जनामा कोरोना सङ्क्रमण, एकै दिन ३१ जना निको भएर घर फर्किए

कर्णाली प्रदेशमा थप ५५ जनामा कोरोना सङ्क्रमण देखिएको छ । बिहीबार नयाँ ५५ जना सङ्क्रमित थपिएपछि कर्णालीमा कोरोना सङ्क्रमितको सङ्ख्या ७६३ पुगेको छ । सामाजिक विकास मन्त्रालयअन्तर्गत जनस्वास्थ्य सेवा महाशाखाका अनुसार प्रदेश अस्पताल र र पशुपन्छी रोग अन्वेषण प्रयोगशाला सुर्खेतमा गरिएको परीक्षणमा दैलेखका ४८ जना, सुर्खेतका छ जना र काठमाण्डौँ घर भइ हाल सुर्खेत रहेका एक जनामा रहेका छन् ।

विश्व बैङ्कद्वारा नेपालका लागि ५४ अर्ब ऋण स्वीकृत

विश्व बैङ्कले नेपाल सरकारलाई ऋणस्वरुप रु ५४ अर्ब उपलब्ध गराउने भएको छ । सडकहरूको सुधार एवं सुरक्षा कायम गर्दै बृहत्तर सीमापार व्यापारको माध्यमबाट कोभिड–१९ को महामारीपछिको आर्थिक स्थितिको पुनर्बहालीका लागि मार्गनिर्धारण गर्न तथा विशेषगरी महिलालाई रोजगारीका अवसर प्रदान गर्ने परियोजनाका निम्ति बैंकले उक्त रकम आज स्वीकृत गरेको हो ।

सप्तरीमा सङ्क्रमितको सङ्ख्या १२१ पुग्यो

सप्तरीमा कोरोना भाइरस सङ्क्रमितको सङ्ख्या १२१ पुगेको छ । बिहीबार जिल्लाको हनुमाननगर कङ्कालिनी नगरपालिका छ जना सङ्क्रमित थपिएको छ । उनीहरू १५ वर्षदेखि माथि र ३८ वर्षमुनिका छन । आइसोलेसन बेड अभावले सङ्क्रमितहरू अहिले क्वारेन्टाइनमै रहेको बताइएको छ ।