२४ घण्टामा २४१ सङ्क्रमित थपिए, दुई जनाको मृत्यु

पछिल्लो २४ घण्टामा २४१ जना कोरोना भाइरसका सङ्क्रमित थपिएका छन् । पाँच हजार ५१० जनामा पीसीआर परीक्षण गरिएकोमा २४१ जनामा कोरोना सङ्क्रमण पुष्टि भएको स्वास्थ्य तथा जनसङ्ख्या मन्त्रालयले जनाएको छ ।

विश्व स्वास्थ्य संगठनले अनुमति दिए पुस अन्तिमदेखि बुस्टर डोज : मन्त्री खतिवडा

स्वास्थ्य तथा जनसंख्या मन्त्री विरोध खतिवडाले विश्व स्वास्थ्य संगठनले अनुमति दिएको खण्डमा पुस अन्तिमदेखि बुस्टर डोज दिन सुरू गरिने जानकारी दिनुभयो । मन्त्री खतिवडाले मन्त्रालयको नियमित प्रेस ब्रिफिङमा बोल्दै विश्व स्वास्थ्य संगठनको अनुमति पाएको अवस्थामा छिट्टै बुस्टर डोज दिन सरकार तयार रहेको जानकारी दिनुभयो ।

‘खोप सञ्चालन गर्न सिरिन्जको अभाव छैन’

सिरिन्ज अभाव कारण खोप कार्यक्रम प्रभावित नहुने आपूर्ति व्यवस्थापन शाखले प्रष्ट पारेको छ । खोप भण्डारणको अनुपातमा सिरिन्ज नभए पनि तत्काल सिरिन्जको अभावका कारण खोप कार्यक्रम प्रभावित नहुने स्वास्थ्य सेवा विभागको आपूर्ति व्यवस्थापन शाखाका प्रमुख डा. सुरेन्द्र चौरसियाले प्रष्ट पार्नुभयो ।

नेपालमा थप एक जनामा ओमिक्रोन पृष्टि

नेपालमा थप एक जनामा कोरोनाभाइरसको नयाँ भेरियन्ट ओमिक्रोन पृष्टि भएको छ । स्वास्थ्य तथा जनसंख्या मन्त्रालयका सहप्रवक्ता डा. समिरकुमार अधिकारीले ५८ वर्षिया पुरुषमा ओमिक्रोन भेरियन्ट पुष्टि भएको जानकारी दिनुभयो । उहाँले संक्रमित व्यक्ति ओमिक्रोन फैलिएको देशबाट आएको भए पनि उहाँले कुन देशबाट आएकाे भन्ने खुलाउन चहानु भएन । 

तनहुँमा ३८ हजार बढी बालबालिकालाई विद्यालयमै खोप

तनहुँमा १२ वर्षदेखि माथिका ३८ हजारभन्दा बढी बालबालिकालाई विद्यालयमा कोरोनाविरुद्धको मोडर्ना खोप दिइएको छ । विभिन्न जिल्लामा बालबालिकाका लागि खोप अभियान सञ्चालन गर्ने निर्देशन गरेसँगै बुधबार भानु नगरपालिका र बन्दीपुर गाउँपालिकामा बुधबार, बाँकी पालिकामा बिहीबार र शुक्रबार खोप लगाउने स्वास्थ्य कार्यालय तनहुँका सूचना अधिकारी शङ्करबाबु अधिकारीले जानकारी दिनुभयो ।