बग्दाद, कात्तिक १५ गते । राष्ट्रपति बरहाम सालेहले देशमा एक महिनादेखि सरकार विरोधी हिंसात्मक विरोध प्रदर्शन जारी रहेको भन्दै मध्यावधि चुनाव गर्न प्रतिबद्ध रहेको बताउनुभएको छ । तर प्रदर्शनकारीहरुले चुनावले मात्र समस्याको समाधान नहुने बताएका छन् ।
टेलिभिजनमा बिहीबार प्रशारित एक सन्देशमा राष्ट्रपति सालेहले प्रधानमन्त्री अदेल अब्देल माहदी राजिनामा गर्न तयार रहनु भएको बताउनुभयो । उहाँले प्रधानमन्त्री पदका लागि अर्को कुनै व्यक्ति तत्काल तयार नरहेको पनि बताउनुभयो ।
राष्ट्रपति सालेहले भन्नुभयो, “प्रधानमन्त्रीले राजिनामा दिने बताइसक्नु भएको छ । सबैलाई स्वीकार्य विकल्पमा पुग्न सबै राजनीतिक दललाई आग्रह गर्दछु ।”
उहाँले नयाँ निर्वाचन कानुन र निगरानी आयोगमा सहमति हुनासाथ चुनाव गर्न आफू प्रतिबद्ध रहेको बताउनुभयो । तर उहाँको सन्देशले प्रदर्शनकारीलाई खासै प्रभावित गर्न सकेको छैन ।
राष्ट्रपतिको सन्देशका बारेमा बग्दादको सडकमा भेटिएका एक ४९ वर्षीय हेदर काजिमले भन्नुभयो, “अब्देल माहदीको राजिनामाले मात्र समस्याको समाधान गर्दैन । समस्या त सत्तारुढ दलहरुभित्रै छ, प्रधानमन्त्री अब्देल माहदीसँग होइन ।”
इराकी नेताहरुले ठुल्ठूला प्रदर्शनलाई जारी राख्ने घोषणा गरेका छन् । गत अक्टोबर १ मा बेरोजगारी र भ्रष्टाचारको विरोधमा शुरु भएको यो प्रदर्शन हाल सरकारको विरोधमा केन्द्रित भएको छ ।
राष्ट्रपति सालेहले पछिल्लो समय प्रधानमन्त्री र अन्य दलहरुसँग गम्भीर विचार विमर्श जारी राख्नु भएको छ । प्रदर्शनका बारेमा छलफल गर्न संसदको बैठक समेत डाकिएको छ । प्रधानमन्त्री माहदीले टेलिभिजनबाट संसदका कारबाही प्रत्यक्ष प्रशारण गरिए आफू संसदको रोष्ट्रममा उभिएर सांसदहरुले राखेका प्रश्नको जवाफ दिन तयार रहेको बताउँदै आउनुभएको छ ।
७७ वर्षीय अब्देल माहदी इराकको प्रधानमन्त्रीमा एक वर्षअघि चुनिनु भएको हो । उहाँलाई मोक्तादा सदर र संसदीय नेता हादी अल–अमेरीको समर्थन छ । तर पछिल्लो समय मोक्तादा सदरले प्रदर्शनकारीलाई समर्थन गर्नुभएको छ भने अमेरी र अरु केही दलले सरकारलाई समर्थन गरिरहेका छन् ।
एक महिनादेखिको यस प्रदर्शनका कारण कम्तीमा २५७ जनाको मृत्यु हुनुका साथै १० हजारभन्दा बढी घाइते भएका छन् । गत सातामा मात्र १०० जनाको ज्यान गएको इराकी मानव अधिकारी आयोगले जनाएको छ ।
२०८१ मंसिर ८ शनिवार
