गोरखापत्र अनलाइन
काठमाडौँ, जेठ १६ गते । चीनले भारतसँगको सीमा विवादको मध्यस्थता गर्ने अमेरिकी राष्ट्रपति डोनाल्ड ट्रम्पको प्रस्ताव खारेज गरेको छ । चीनले दुवै देश अस्तित्वमा रहेको सञ्चार संयन्त्रबाट समस्या समाधान गर्न प्रयासरत रहेको जनाउँदै ट्रम्पको प्रस्ताव अस्वीकार गरेको हो ।
“हामीलाई तेस्रो पक्षको हस्तक्षेप आवश्यक छैन ।” चिनियाँ विदेश मन्त्रालयका प्रवक्ता चाओ लिचियानले शुक्रबार आयोजित पत्रकार सम्मेलनमा प्रष्ट्याउनुभयो । पूर्वी लद्दाख र सिक्किम क्षेत्र जोड्ने चिनियाँ सीमामा भारत र चीनको सुरक्षाकर्मीबीच तनाव बढेपछि अमेरिकी राष्ट्रपति ट्रम्पले बुधबार दुवै देशको सीमा विवाद मुद्दामा अमेरिका मध्यस्थता गर्न सक्षम, इच्छुक र तयार रहेको बताउनुभएको थियो ।
यसअघि नियमित पत्रकार सम्मेलनमा ट्रम्पको मध्यस्थताबारे सोधिएको जिज्ञासामा भारतीय विदेश मन्त्रालयका प्रवक्ता अनुराग श्रीवास्तवले चिनियाँ पक्षसँग शान्तिपूर्ण रुपमा समस्या समाधानका लागि पहल भइरहेको बताउनुभएको थियो । उहाँले दुवै देशसँग सीमा विवाद समाधानका लागि संयन्त्र रहेको बताउनुभयो ।
द हिन्दूस्तान टाइम्सका अनुसार चिनियाँ रक्षा मन्त्रालयका प्रवक्ता वरिष्ठ कोलोनेल रेन ग्वाक्योङ्ले पनि दुवै पक्षसँग सञ्चार गर्ने क्षमता र सीमा समस्याका लागि स्थापित संयन्त्रमार्फत् अन्तरक्रिया गरेर समाधान गर्ने उपाय रहेको बताउनुभएको छ ।
