टोकियो, चैत ८ गते । जापान सरकारले केही समयदेखि लगाउँदै आएको कोभिड विरुद्धको प्रतिबन्धलाई यहाँका १८ वटा जिल्लामा फुकुवा गरेको जनाएको छ । जापानमा पछिल्लो समयमा कोभिडको सङ्क्रमण बढ्दै गएपछि यसका विरुद्ध अपनाउनुपर्ने मापदण्डका रुपमा प्रतिबन्ध लगाइएको थियो ।
जापान सरकारले यहाँका ४७ प्रिफेक्चरमध्ये १८ वटाका यस्ता प्रतिबन्धलाई हटाएको जनाएको समाचारमा बताइएको छ । यसरी प्रतिबन्ध हटाइएका प्रिफेक्चरहरुमा टोकियो र ओसाका पनि छन् । यहाँ गएको जनवरी ८ देखि यस्ता प्रतिबन्ध लगाइएको थियो । आज मङ्गलबारदेखि यहाँका अधिकारीहरुले १८ प्रिफेक्चरमा यस्ता प्रतिबन्धलाई हटाएको जनाएको हो ।
यहाँका नागरिकलाई सार्वजनिक स्थलमा धेरै जम्मा हुन तथा होटल रेष्टुरेन्टहरु सञ्चालन गर्न पनि सीमित सङ्ख्याका ग्राहकमा मात्र दिइएको थियो । तर अहिले ती सबै प्रतिबन्ध हटाइएको छ । यहाँ अब नागरिकहरु ठूलो सङ्ख्यामा जम्मा हुने र आफ्ना व्यवसायहरु सञ्चालन गर्न पाउने भएका छन् ।
बाँकी प्रिफेक्चरहरुमा भने कोभिड १९ को सङ्क्रमण कायमै रहेकाले अहिले प्रतिबन्ध नै कायम राखिएको छ । आगामी केही दिनसम्म यस सङ्क्रमणको अवस्था हेरेर मात्र ती स्थानमा पनि प्रतिबन्ध हटाउन सकिने सरकारले जनाएको छ ।
