बेलायतमा कोरोना भाइरस संक्रमण सुरु भएपछिकै बढी सङ्क्रमित

बेलायतमा कोरोना भाइरसको सङ्क्रमण सुरु भएदेखिकै सबैभन्दा बढी सङ्क्रमित भएका बताइएको छ । यहाँ गएको २४ घण्टा यता मात्र अर्थात् सोमबार मात्र कम्तीमा पनि १ लाख २९ हजार ४७१ जना सङ्क्रमित भेटिएका छन् । यहाँका स्वास्थ्य अधिकारीहरुले सो कुरा बताएका हुन् ।

दक्षिण सुडानमा सुनखानी दुर्घटना हुँदा ३८ जनाको मृत्यु

दक्षिण सुडानमा सुनखानीमा भएको दुर्घटनामा परी त्यहाँ कार्यरत कम्तीमा पनि ३८ जना खानी मजदुरको ज्यान गएको छ । सो खानीमा परी अरु पनि केही व्यक्ति घाइते भएका छन् । दक्षिण सुडानको पश्चिमी क्षेत्र वेस्ट कोर्दाफानमा रहेको सो खानीमा अकस्मात विस्फोट भएको थियो ।

यमनमा हिंसा झन् बढेकामा संयुक्त राष्ट्रसङ्घद्द्वारा चिन्ता व्यक्त

संयुक्त राष्ट्रसङ्घीय महासचिव एन्टोनियो गुटर्रेसका विशेष दूत ह्यान्स ग्रन्डबर्गले यमनमा पछिल्ला वर्षहरुमा हिंसा बढ्दै गएको बताउनुभएको छ । उहाँले यमनमा बढ्दो यो हिंसाको अवस्था चिन्ताजनक रहेको पनि बताउनुभएको छ । यहाँ पछिल्ला वर्षहरुमा सर्वसाधारण नागरिकहरु हिंसामा पर्ने गरेको भन्दै उहाँले चिन्ता व्यक्त गर्नुभएको हो ।

इजरायलले ५५ देशको यात्रा प्रतिबन्ध हटाउने

इजरायलले ५५ देशमा यात्रा प्रतिबन्ध फुकुवा गर्ने स्वास्थ्य मन्त्रालयले मंगलबार जनाएको छ । मन्त्रिपरिषद् र संसदीय समितिको स्वीकृतिपछि बिहीबारदेखि लागू हुने गरी सो सहजीकरण हुने मन्त्रालयले जनाएको छ ।

अफगानिस्तानमा सात हजार विकास परियोजनाहरू अधूरा

गरिबी घटाउने, समुदायहरूको लागि सामाजिक(आर्थिक अवस्था सुधार गर्ने र युवाहरूको बसाइँसराइलाई रोक्ने उद्देश्यका सात सञ्चालित नागरिक चार्टर राष्ट्रिय प्राथमिकता कार्यक्रम (सिसिएनपिपि) का कम्तिमा सात हजार परियोजनाहरू अफगानिस्तामा अधूरा रहेका छन् ।