भैरहवा समाचारदाता
भैरहवा, भदौ १९ गते । प्रदेश पाँचका उद्योग, पर्यटन, वन तथा वातावरणमन्त्री लीला गिरीले बुद्धको जन्मस्थल लुम्बिनी क्षेत्रमा लगानी गर्न चीन सरकार र त्यहाँको निजी क्षेत्र तयार रहेको बताउनु भएको छ ।
प्रदेश सरकारको तर्फबाट एक प्रतिनिधि मण्डलको नेतृत्व गर्दै चीन जानुभएका मन्त्री गिरीले स्वदेश फिरेपछि उक्त जानकारी दिनु भएको हो । सञ्चारकर्मीसँगको भेटमा उहाँले चीन सरकार र त्यहाँको निजी क्षेत्र लुम्बिनी क्षेत्रको पर्यटन, उद्योग, कृषि र व्यापारमा लगानी गर्न तयार भएको आफूले पाएको बताउनुभयो ।
मन्त्री गिरीसहित प्रदेशको अर्थ, उद्योग तथा पर्यटन समितिका सभापति दधिराम शर्मा, नेपाली काङ्ग्रेसका संसदीय दलका प्रमुख सचेतक निर्मला क्षेत्रीलगायतका टोली चीन भ्रमणमा गएको थियो । उक्त टोली चीनको गान्सु प्रान्तमा आयोजित चौथो सांस्कृतिक तथा नवौं पर्यटन महोत्सवमा सहभागी भई नेपाल फर्केको हो ।
चीनमा रहँदा त्यहाँका अधिकारी समक्ष सिल्क रोड, वान बेल्ट वान रोडको अवधारणा, कृषि र पर्यटनको विषयमा पनि गम्भीर छलफल भएको मन्त्री गिरीले बताउनुभयो ।
प्रान्तीय भ्रमण गरेको नेपालको प्रतिनिधि मण्डलसँग चिनियाँ सरकारी टोलीले गान्सु प्रान्तमा रहेको मरुभूमिमा बनाइएको मोनका केक भन्ने पहाडलाई लुम्बिनीको सांस्कृतिक सम्बन्ध जोडेर अगाडि बढाउने विषयमा छलफल भएको छ ।
यसैगरी गान्सु प्रान्तको सियान, सिचुवानको छेन्दु र लुम्बिनी क्षेत्रसँग जोडेर बौद्ध पर्यटन प्रवद्र्धन गर्न छलफल अगाडि बढाइएको मन्त्री गिरीले बताउनुभयो ।
मन्त्री गिरीले चिनियाँहरू लुम्बिनीमा भ्रमण गर्न अत्यन्तै उत्साहित भएको बताउँदै नेपालीलाई चीन र चिनियाँले नेपाल भ्रमण गर्ने गरी कार्यक्रम अगाडि बढाउनुपर्ने साझा धारणामा समेत छलफल भएको बताउनुभयो । उहाँले चिनियाँहरू नेपालका पर्यटन व्यवसायीसँग हातेमालो गरेर अगाडि बढ्न चाहेको बताउँदै चिनियाँ प्रतिनिधि मण्डल छिट्टै नेपाल आउने र लगानीको क्षेत्र पहिचान गरी आवश्यक कार्यक्रम अगाडि बढाउने समेत गिरीले जानकारी दिनुभयो ।
