लक्की चौधरी
काठमाडौँ, भदौ ६ गते । नेपाल कम्युनिष्ट पार्टी (नेकपा) द्वारा गठित छ सदस्यीय कार्यदलले बुझाएको प्रतिवेदन नीतिगत सुधारमा केन्द्रित रहेको छ । तत्कालीन समस्या समाधानभन्दा दीर्घकालीन समाधानको पक्षमा प्रतिवेदन केन्द्रित रहेको कार्यदलका सदस्यहरुले बताउनुभयो । दुई अध्यक्ष केपी शर्मा ओली र पुष्पकमल दाहाल ‘प्रचण्ड’ लाई शनिबार साँझ बालुवाटार पुगेर कार्यदलले प्रतिवेदन हस्तान्तरण गरेको थियो ।
गत साउन ३० गते गठित कार्यदलले ८ दिन लगाएर प्रतिवेदन पेश गरेको हो । पार्टीको आन्तरिक समस्या समाधानका उपाय पहिल्याउने गरी कार्यदल गठन गरिएको थियो । प्रतिवेदनमा मुलतः पार्टीको एकता प्रक्रिया, पार्टीको संस्थागत परिचालन, दुई जना अध्यक्षको अधिकार र सीमा, पार्टीको एकताको बाँकी कामको टुङ्गो, एकता महाधिवेशन र त्यसले गर्नुपर्ने काम, सरकारको कामलाई प्रभावकारी बनाउने आधारका बारेमा सुझाव दिइएको कार्यदलका सदस्य सुरेन्द्र पाण्डेले जानकारी दिनुभयो ।
त्यस्तै, संसदमा संसदीय दलको प्रभावकारिता, सीमा समस्या र त्यसको सामधान, शान्ति प्रक्रियाका बाँकी काम, बाढी पहिरोबाट सिर्जित समस्या र समाधानको उपाय, कोभिड १९ समस्या, त्यसको व्यवस्थापन र न्यूनिकरणको पहल, सरकार सञ्चालनमा भएका समस्या र मन्त्रिपरिषद पुनर्गठनको नीतिगत सुझाव प्रतिवेदनमा दिइएको कार्यदलका सदस्य पाण्डेले बताउनुभयो । कार्यदलले धेरै मेहनत गरेर प्रतिवेदन बुझाएको र अब सचिवालय बैठकमा अध्यक्षद्वारा सो प्रतिवेदन टेबल हुने बताइएको छ ।
सचिवालयमा छलफल गरी सुझावसहित अनुमोदन गरी स्थायी कमिटी बैठकमा पेश हुने स्थायी कमिटी सदस्य पाण्डेले बताउनुभयो । उहाँकाअनुसार स्थायी कमिटी बैठकमा पनि त्यसबारे छलफल भई सर्वसम्मत पारित हुनेछ । सरकारको कामलाई प्रभावकारी बनाउन पार्टीको सुझाव अपरिहार्य रहेकाले पार्टीको संस्थागत सुझाव र परामर्श अनिवार्य रहेको प्रतिवेदनमा सुझाव दिइएको छ ।
‘सरकार पार्टीले बनाउने’ हुनाले सरकारले पार्टीको संस्थागत सुझाव सुन्नुपर्ने सुझाव प्रतिवेदनमा उल्लेख गरिएको बताइएको छ । विधिगत र प्रक्रियागत रुपमा अगाडि बढ्दा सरकारको काम पनि प्रभावकारी हुने र पार्टी पनि सफल हुने कार्यदलका अर्का सदस्य नाम नबताउने शर्तमा भन्नुभयो । कार्यदलले प्रतिवेदन तयार पार्दा विभिन्न चरणमा छलफल भएको र छलफलमा विवाद, टिकाटिप्पणी स्वाभाविक रहेको बताउँदै उहाँले विवाद र टिप्पणीलाई ‘झगडा’को रुपमा बुझ्न नहुने बताउनुभयो ।
“६ जना सदस्यहरू एकै ठाउँमा उभिएर एक मतका साथ प्रतिवेदन सर्वसम्मत तयार गरेर दिनु नै सहमतिको दस्तावेज हो” ती सदस्यले दाबी गर्नुभयो । नेकपाले गत साउन ३० गते ६ सदस्यीय कार्यदल गठन गरेको थियो । कार्यदलमा महासचिव विष्णुप्रसाद पौडेल, स्थायी कमिटी सदस्य शङ्कर पोखरेल, भीमबहादुर रावल, सुरेन्द्र पाण्डे, जनार्दन शर्मा र पम्फा भुसाल सदस्य हुनुहुन्थ्यो । कार्यदलले ३१ गतेबाट काम शुरु गरेको थियो ।
