काठमाडौँ, चैत ११ गते। चीनका विदेशमन्त्री वाङ यी तीनदिने औपचारिक भ्रमणका क्रममा शुक्रबार दिउँसो नेपाल आइपुग्दै हुनुहुन्छ । परराष्ट्रमन्त्री डा. नारायण खड्काको निमन्त्रणामा चिनियाँ विदेशमन्त्री वाङ शुक्रबार दिउँसो नेपाल आउन लाग्नुभएको हो ।
विदेशमन्त्री वाङको भ्रमणलाई केन्द्रित गरेर राजधानीको सुरक्षा व्यवस्था कडा पारिएको छ । त्रिभुवन अन्तर्राष्ट्रिय विमानस्थलदेखि विदेशमन्त्री वाङको वासस्थानसम्म सुरक्षा व्यवस्था कडा पारिएको हो । विमानस्थलदेखि द्वारिका होटलसम्मको सुरक्षा व्यवस्था कडा पारिएको हो। विदेशमन्त्री वाङ सवार हुनुहुने काठमाडौंका मुख्य सडकमा सुरक्षा व्यवस्था कडा पारिएको छ ।
परराष्ट्र मन्त्रालयका प्रवक्ता सेवा लम्सालका अनुसार विमानस्थलमा विदेशमन्त्री वाङलाई परराष्ट्रसचिव भरतराज पौड्यालसहितको टोलीले स्वागत गर्नुहुनेछ।
नेपाल भ्रमणमा चीनका विदेशमन्त्रीले राष्ट्रपति विद्यादेवी भण्डारी र प्रधानमन्त्री शेरबहादुर देउवासँग शिष्टाचार भेट गर्नुहुनेछ। त्यस्तै चैत १२ गते परराष्ट्रमन्त्री डा. खड्कासँग उहाँले द्विपक्षीय भेट गर्नुहुनेछ ।
नेपाली प्रतिनिधिमण्डल र चीनका विदेशमन्त्री वाङसहितको प्रतिनिधिमण्डलबीच द्विदेशीय सहकार्य र विगतका साझेदारीका सवालमा थप छलफल र कार्यान्वयन प्रगतिका विषयमा छलफल हुने परराष्ट्र मन्त्रालयमा चीन मामिला हेर्ने सहसचिव लोकबहादुर थापाले बताउनुभयो।
जलविद्युत् परियोजना, ट्रान्स हिमालयन सम्पर्क सञ्जाल, बीआरआई परियोजनासँग सम्बन्धित विषयलाई नयाँ पहलसाथ अघि बढाउने विषयमा छलफल र सहमतिको आधार बनाइने मन्त्रालयले जनाएको छ।
यीबाहेक कोभिड–१९ महामारीपछिको आर्थिक पुनस्र्थापनाका साथै भविष्यमा आइपर्ने महामारीजन्य सङ्कटका लागि चीनले गर्नसक्ने थप सहयोगका विषयमा पनि एक खालको खाका मन्त्रालयले बनाएको छ।त्यसमा नेपालमा थप लगानीको अवसरका विविध क्षेत्रलाई खुट्याएर सरकारका तर्फबाट द्विपक्षीय वार्तामा अघि सारिने भएको छ।
नेपालसँग रेल्वे परियोजनालगायतका १४ वटा विषयमा आपसी सहकार्य गर्ने सम्झौता यसअघि नै भएको थियो।नौवटा सम्झौता भने नेपालको निजी तथा सार्वजनिक संस्था र कम्पनीसँग चिनियाँ संस्था र कम्पनीको सम्झौता रहेको मन्त्रालयले जनाएको छ।
नेपालमा चिनियाँ रेल निर्माणको सम्बन्धमा थप छलफल हुने जनाइएको छ।चिनियाँ विदेशमन्त्री वाङले पूर्वप्रधानमन्त्री तथा नेकपा (एमाले)का अध्यक्ष केपी शर्मा ओली र नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’लगायतका उच्चस्तरीय नेतृत्वसँग भेटवार्ता गर्नुहुनेछ।
