काठमाडौं, चैत १८ गते । प्रधानमन्त्री शेरबहादुर देउवा भारतको नयाँ दिल्ली पुग्नुभएको छ । तीनदिने औपचारिक भ्रमणका क्रममा प्रधानमन्त्री देउवा शुक्रबार दिउँसो इन्दिरा गान्धी अन्तर्राष्ट्रिय विमानस्थलमा अवतरण गर्नुभएको हो ।
विमानस्थलमा भारतका रक्षा तथा पर्यटन राज्यमन्त्री अजय भट्टले प्रधानमन्त्री देउवासहितको टोलीलाई स्वागत गर्नुभएको छ । शुक्रबार देउवा चाणक्यपुरीस्थित आईटीसी मौर्य होटलमा बस्नुहुनेछ ।
भारतीय प्रधानमन्त्री नरेन्द्र मोदीको निमन्त्रणामा नयाँदिल्ली पुग्नुभएको प्रधामन्त्री देउवासँग आजै अपराह्न साढे ४ बजे भारतीय विदेशमन्त्री एस जयशङ्कर र सुरक्षा सल्लाहकार अजित डोभालले भेट गर्नुहुने कार्यक्रम छ ।
प्रधानमन्त्री देउवाको भ्रमण टोलीमा पत्नी एवम् काँग्रेस केन्द्रीय सदस्य आरजु राणा देउवा, ऊर्जा तथा जलस्रोतमन्त्री पम्फा भुसाल, स्वास्थ्यमन्त्री विरोध खतिवडा र विभिन्न मन्त्रालयका सचिवलगायत सहभागी हुनुहुन्छ ।
