असोज ५ अघि नै राजमार्ग मर्मत

वर्षामा भत्किएका राजमार्गका खाल्डाखुल्डी असोज १० गतेसम्म मर्मत गरिसकिने भएको छ । असोज ५ गतेबाट दशैँ, तिहार र छठ पर्वका लागि बसको अग्रिम टिकट बुकिङ खुलाएका यातायात व्यवसायीले सडक मर्मत गरिदिन आग्रह गरेपछि सडक विभागले तत्काल मर्मत गर्न लागेको हो ।

सुरुङमार्गको सम्झौता हुँदै

थानकोट–नागढुङ्गा–सिस्नेखोला सुरुङमार्ग निर्माणका लागि असोज १ गते ठेक्का सम्झौता हुनेभएको छ । सुरुङमार्ग निर्माणको सबभन्दा ठूलो अवरोधको रूपमा रहेको जग्गा अधिग्रहण र मुआब्जाको समस्या समाधान भएसँगै ठेक्का सम्झौता हुने तय भएको हो ।

बालबालिका निर्णायक शक्ति : राष्ट्रपति

राष्ट्रपति विद्यादेवी भण्डारीले सम्पूर्ण बालबालिकालाई असल नागरिक बनेर देशको गौरव बढाउन आग्रह गर्नुभएको छ । राष्ट्रिय बालदिवसको अवसरमा शनिबार राष्ट्रपति भवन शीतल निवासमा आयोजित कार्यक्रममा राष्ट्रपतिले सम्पूर्ण बालबालिकाको स्वस्थ जीवन र उज्ज्वल भविष्यको शुभकामना पनि दिनुभयो ।

नागरिकता विधेयक: राजनीतिक सहमतिमै अगाडि बढाइने

वैवाहिक अङ्गीकृत नागरिकता विवादमा प्रमुख राजनीतिक दलहरू झनै टाढिएका छन् । प्रतिनिधिसभा राज्य व्यवस्था तथा सुशासन समितिले शनिबार विधेयक टुङ्ग्याउने लक्ष्य लिए पनि दलहरूबीच मत बनेपछि राजनीतिक सहमतिका लागि बैठक स्थगित गरिएको छ ।

उपनिर्वाचनका लागि साढे चार लाख मतदाता

निर्वाचन आयोगले आगामी मङ्सिर १४ गते हुने उपनिर्वाचनमा मतदान गर्ने मतदाताको अन्तिम नामावली तयार गर्ने क्रममा दाबी विरोधका लागि १५४ वटा वडा कार्यालयमा सार्वजनिक गर्ने भएको छ ।