१५ औं बलिदानी दिवसको उपहार ‘मधेस प्रदेश’

प्रत्येक वर्ष माघ ५ गते लहानको रमेश महतो शहिद पार्कमा मनाउने बलिदानी दिवसको दुई दिन अघि प्रदेश २ को नामाकरण मधेस प्रदेश गरेकोमा मधेस आन्दोलनको त्रक्रममा लहानमा ज्यान उत्सर्ग गर्ने पाँच शहिद परिवारमा खुसी छाएको छ । उत्साहित भएर लहानस्थित शहिद पार्कलाई जनता समाजवादी पार्टीका नेता रङगरोङगन र सरसफाई गरेका छन् ।

स्थानीय तहको निर्वाचन समयमै सम्पन्न गर्ने सहमति

सरकार सञ्चालनका लागि गठित पाँचदलीय समन्वय समितिको बैठकमा आगामी स्थानीय तहको निर्वाचन संविधानमा व्यवस्था भएबमोजिम वैशाखमा नै सम्पन्न हुनुपर्नेमा सहमति जुटेको छ ।

सर्वोच्चमा ३५ जना कर्मचारीमा संक्रमण, सेवा कटाैतीबारे पूर्ण बैठक बस्दै

सर्वोच्च अदालतमा आज पूर्ण बैठक (फूलकोर्ट) बस्दै छ । प्रधानन्यायाधीश चोलेन्द्र शम्शेर जबराले पूर्ण बैठक बोलाउनुभएको सर्वोच्चका सूचना अधिकारी देवेन्द्र ढकालले जानकारी दिनुभयो । कोरोनाको सङ्क्रमण देशव्यापी रूपमा बढ्दै जाँदा सर्वोच्चका न्यायाधीश र कर्मचारीमा सङ्क्रमण देखिएपछि पूर्ण बैठक बस्न लागेको उहाँले जानकारी दिनुभयो । बैठक मंगलबार दिउँसो १ बजे सर्वोच्चमा बस्ने उहाँले बताउनुभयो ।

स्थानीय तहको निर्वाचन लगायतका विषयमा छलफल केन्द्रित

सरकार सञ्चालनका लागि गठित पाँच दलीय गठबन्धन समन्वय समितिको बैठक प्रधानमन्त्री निवास बालुवाटारमा सुरू भएकाे छ । सत्तारुढ दल नेपाली काँग्रेसका वरिष्ठ नेता रामचन्द्र पौडेलको संयोजकत्व रहेको उच्चस्तरीय समन्वय समिति बैठकमा स्थानीय तहको निर्वाचनका सम्बन्धमा छलफल केन्द्रीत रहेको नेकपा माओवादी केन्द्रका अध्यक्ष पुष्पकमल दाहाल प्रचण्डका प्रेस संयोजक सूर्य किरण शर्माले बताउनुभयो ।

आईसीयू र भेन्टिलेटरमा भर्ना हुने सङ्क्रमित थोरै

स्वास्थ्य तथा जनसङ्ख्या मन्त्रालयका सचिव डा. रोशन पोखरेलले नेपालमा कोरोना सङ्क्रमितको सङ्ख्या एकै दिन २० हजार नाघ्ने प्रक्षेपण गर्नुभएको छ । उहाँले अबको तीनदेखि चार हप्ताभित्र कोरोना सङ्क्रमण एकदमै उच्च बिन्दुमा पुग्ने बताउनुभयो । कोरोना सङ्क्रमितमध्ये १० प्रतिशतलाई अस्पताल भर्ना गर्नुपर्ने अवस्था आउने उहाँले बताउनुभयो ।