शेर्पाको निधनप्रति दुःख व्यक्त

नेपाली कांग्रेसका सभापति एवं प्रधानमन्त्री शेरबहादुर देउवाले कांग्रेसका केन्द्रीय सदस्य आङगेलु शेर्पाका पिता एवं सोलुखुम्बु कांग्रेसका पुराना नेता नुर्वुवाङ्डा शेर्पाको निधनप्रति दुःख व्यक्त गर्नुभएको छ ।

माओवादी महाधिवेशनमा समूहगत छलफलको निष्कर्ष प्रस्तुत हुँदै

नेकपा माओवादी केन्द्रको आठौँ महाधिवेशनअन्तर्गत पार्टी अध्यक्ष पुष्पकमल दाहाल ‘प्रचण्ड’ले पेश गर्नुभएको राजनीतिक प्रतिवेदनमाथि समूहगत छलफलको निष्कर्ष प्रस्तुत हुने कार्यक्रम रहेको छ ।

विद्युत् आपूर्ति व्यवस्थापनमा सकस

जाडो बढेसँगै घरायसी खपत उच्च भइरहँदा काठमाडौँ उपत्यकामा विद्युत् आपूर्ति व्यवस्थापनमा नेपाल विद्युत् प्राधिकरणले सकस भोगिरहेको छ । वितरण लाइन तथा ट्रान्सफर्मरको क्षमताले थेग्नेभन्दा धेरै लोड सिर्जना हुँदा ट्रान्सफर्मर पड्कने तथा तार जल्दा कतिपय स्थानमा विद्युत् आपूर्ति नै अवरुद्ध हुने समस्या बढेको छ ।

जनताको घरदैलोमा कर्मचारी पुग्नुपर्छ

प्रधानमन्त्री शेरबहादुर देउवाले जनताको घरदैलोमा सरकार पुग्न कर्मचारी नै घरदैलोमा पुग्नुपर्ने बताउनुभएको छ । नेपाल निजामती कर्मचारी युनियनको केन्द्रीय पदाधिकारीसँग मङ्गलबार भएको भेटमा उहाँले सरकारका कार्यक्रम जनताको घरदैलोमा पु-याउने काम कर्मचारीले गर्ने भएकाले कर्मचारी सक्रिय हुनुपर्ने बताउनुभयो ।

केन्द्रीय समितिमा खुला र समावेशी बराबर

नेपाल कम्युनिस्ट पार्टी (माओवादी केन्द्र)ले केन्द्रीय समितिमा ५० खुला र ५० प्रतिशत समावेशी छुट्याउने प्रस्ताव गरेको छ । पार्टी अध्यक्ष पुष्पकमल दाहाल ‘प्रचण्ड’ले सोमबार महाधिवेशनको बन्दसत्रमा प्रस्तुत गर्नुभएको राजनीतिक प्रतिवेदनमाथि समूहगत छलफल चलिरहेका बेला मङ्गलबार बसेको स्थायी समिति बैठकमा समावेशीको क्लस्टर मिलाउने विषयमा छलफल भएको छ ।