माओवादी केन्द्रीय कार्यसमितिको बैठक

सत्ता साझेदार दल नेकपा (माओवादी केन्द्र)को केन्द्रीय कार्य समितिको बैठक सुरु भएको छ । माओवादी केन्द्रको पदाधिकारी चयन, कार्य विभाजन, कार्य समितिको पूर्णता, स्थानीय चुनाव लगायतका विषयमा छलफल हुने बताइएको छ ।

पाँच महिनापछि संवैधानिक इजलासमा सुनुवाइ, छवटा मुद्दा पेसीमा

करिब पाँच महिनाभन्दा बढी समय प्रभावित भएको संवैधानिक इजलास आजदेखि गठन भई सुनुवाइ सुरु भएको छ । कायममुकायम प्रधानन्यायाधीश दीपककुमार कार्कीले संवैधानिक इजलास गठन गरी छ थान मुद्दामा पेसीसमेत तोक्नुभएको छ । इजलासमा कामु प्रधानन्यायाधीश कार्की, न्यायाधीश मीरा खड्का, हरिकृष्ण कार्की, विश्वम्भरप्रसाद श्रेष्ठ र ईश्वरप्रसाद खतिवडा रहनुभएको छ ।

माओवादी केन्द्रीय समितिको बैठक दिउँसो १ बजे सारियाे

सत्ता साझेदार दल नेकपा (माओवादी केन्द्र) को केन्द्रीय कार्यसमितिको बिहान ११ बजे तय भएको बैठक दिउँसो १ बजे सरेको केन्द्रीय कार्यालयले जनाएको छ । माओवादीको पदाधिकारी एवम् कार्य समितिलाई पूर्णता दिइने, कार्यविभाजन, भावी कार्ययोजना लगायत संसदबाट अनुमोदन भइसकेको अमेरिकी आर्थिक सहायता मिलिनियम च्यालेन्ज कर्पोरेसन (एमसीसी) बारे पनि थप छलफल हुने पार्टी केन्द्रीय कार्यालय सचिव डोरप्रसाद उपाध्यायले बताउनुभयो ।

राष्ट्रिय सभाका बीस सदस्यको पदावधि समाप्त

राष्ट्रिय सभामा २० जना सदस्यको पदावधि शुक्रबारदेखि समाप्त हुँदैछ । गोला प्रथाका आधारमा चार वर्षे कार्यकाल पूरा भई उहाँहरू बिदा हुन लाग्नुभएको हो कार्यकाल पूरा गर्ने सबैभन्दा बढी सांसद नेकपा (एमाले)का हुनुहुन्छ । एमालेका अगमप्रसाद बान्तवा राई, कविता बोगटी, कोमल वली, चक्रप्रसाद स्नेही, नैनकला ओझा, पर्शुराम मेघी गुरुङ, रामलखन चमार र सुमनराज प्याकुरेलको पदावधि समाप्त हुँदैछ ।

संसद् सञ्चालनमा सहयोगी बन्न एमालेलाई आग्रह

सत्तारूढ गठबन्धनले प्रमुख प्रतिपक्ष दल नेकपा (एमाले)लाई अवरुद्ध संसद् सुचारु गर्नका लागि सहयोगी भूमिका निर्वाह गर्न आग्रह गर्ने निर्णय गरेको छ । प्रधानमन्त्री निवास बालुवाटारमा बिहीबार बसेको बैठकले प्रतिपक्ष दलबाट अवरुद्ध संसद् नियमित रूपमा सुचारु गर्न एमालेलाई आग्रह गर्ने निर्णय गरेको नेपाली काँग्रेस पार्टीका महामन्त्री गगनकुमार थापाले बताउनुभयो ।