ध्यान कुलुङ
सङ्खुवासभा, फागुन १२ गते । सिलिचोङ गाउँपालिका २ बालाको सय बर्ष पुरानो बौद्ध स्तुपा टोडफोड गरि त्यस भित्र रहेको पुरातात्विक धातुहररू चोरी भएको थियो । त्यस भित्र एउटा बुद्धको मूर्ति मात्र छोडिएर अन्य सम्पूर्ण बस्तु चोरी भएका थिए ।
भत्किएको उक्त स्तुपा र मूर्तिको सुरक्षाको लागि सिसुवाटार प्रहरी चौकीबाट प्रहरी टोली खटाईएको थियो । उक्त प्रहरी टोलीको सुरक्षामा छोडिएको उक्त मूर्ति पनि आइतबार राती चोरी भएको छ । घटनास्थलमा खटिएको दुई जना प्रहरीहरुले सुरक्षा गर्दा गर्दै उक्त मूर्ति चोरी भएको हो । उक्त मूर्ति पनि चोरी भएको बिहान उज्यालो भएपछि मात्र थाहा भएको वडा नम्बर २ का अध्यक्ष मोहनसंशेर कुलुङले बताउनुभयो । पुनः चोरी भएकाे घटनाका बारेमा प्रहरीहरुसँग बुझ्दा नजिकै रहेको घरमा खाना खान गएको बेला चोरी भएको हुनसक्ने अध्यक्ष कुलुङले बताउनुभयो ।
बालामा एउटै समयमा दुईवटा स्तुपा भत्काईएको थियो । उक्त स्तुपा भित्र बहुमुल्य बस्तुहरु रहेको चर्चा थियो । उक्त बस्तुहरु चोरी गर्न कै लागि स्तुपा भत्काईएको वडा अध्यक्ष कुलुङले बताउनुभयो । उक्त स्तुपा भित्र राखिएको पुरातात्विक वस्तुहरु रहेको स्थानीय जानकारहरुलाई गर्दै कुलुङले बताउनुभयो । बर्षौं अघिदेखिको मुद्रा, सुन, चाँदी, तामा लगायतको धातुहरु स्तुपा भित्र राखिएको ज्येष्ठ जानकारहरुले बताएको अध्यक्ष कुलुङको भनाई छ ।
यस अघिको पटक पटकको चोरी घटनामा कोही पनि कारबाहीमा नपरेपछि सुरक्षा निकायसँग रुष्ट हुँदै आएको स्थानीयहरु प्रहरीकै निगरानीमा रहेको पुरातात्विक वस्तु हराउनु सामान्य नरहेको प्रतिकृया दिन थालेका छन् । सिलिचोङ क्षेत्रमा पछिल्लो समय चोरीको घटना बढ्दो भएपनि सुरक्षा ब्यवस्था कमजोर रहेको स्थानीयको छ । चोरीका पिडितहरुले प्रहरीमा उजुरी दिए पनि अहिलेसम्म कोही पनि कारबाहीको दायरामा आउन नसक्नुले अनुसन्धान अत्यन्तै फितलो रहेको स्थानीयको भनाई छ ।
प्रहरीबाट कुनै पनि घटनाको गहन अनुसन्धान नहुँदा अपराधिक मानसिकता भएकाहररूलाई प्रश्रय मिलेको स्थानीय ईन्द्रबहादुर कुलुङको भनाई छ । केही बर्ष अघि उक्त घटनास्थल नजिकै रहेको बाला माविको विद्यालय भवन तोडफोड गरि कम्प्युटर चोरी गर्नेको पनि पहिचान हुन सकेको थिएन । दुई हप्ता अघि सिलिचोङ गाउँपालिकाको कार्यालय परिसरमा रहेको मोटरसाईकल चोरी गर्ने पनि अहिलेसम्म पत्ता लाग्न सकेको छैन । सिसि टिभिको फुटेज समेत प्रहरीलाई उपलब्ध गराएपनि अहिलेसम्म चोरी गर्नेको पहिचान हुन सकेको छैन ।
यस विषयमा कुरा गर्दा घटनाहरुको अनुसन्धान भईरहेको जिल्ला प्रहरी प्रमुख डिएस्पी मिमबहादुर लामाले बताउनुभयो । जिल्लामा पर्याप्त प्रहरी जनशक्ति नहुँदा अनुसन्धानको नतिजा आउन ढिलो भएको लामाको भनाई छ । थोरै जनशक्ति भए पनि निरन्तर अनुसन्धान भईरहेकोले ढिलो चाँडो कारबाहीको दायरामा आउने डिएस्पी लामाले दावी गर्नुभयो । यसको लागि स्थानीयले पनि अनुसन्धानमा सहयोग गर्न उहाँले आग्रह गर्नुभयो । सवै ठाउँमा सुरक्षाकर्मीलेमात्र सुरक्षा दिन नसक्ने भएकोले स्थानीयले पनि आफ्नो सम्पत्ती सुरक्षित राख्नु पर्ने डिएस्पी लामाले बताउनुभयो ।
