जनार्जन खत्री
सर्लाही, माघ १६ गते । पूर्व–पश्चिम राजमार्ग अन्तर्गत सर्लाहीको बाँके जङ्गलमा शनिबार राती रात्रीबस र मोटरसाइकल ठोक्किँदा एक जनाको मृत्यु भएको छ ।
दुर्घटनामा १३ जना घाइते भएका छन् । सिराहाको बरियारपट्टीबाट काठमाडौंका लागि छुटेको ना ७ ख ७५३ नम्वरको रात्रीबस शनिबार राती ९ बजे ईश्वरपुर नगरपालिका–१२, बाँके जङ्गलस्थित राजमार्गमा ना २९ प ४४९८ नम्वरको मोटरसाइकल आपसमा ठोक्किएका हुन् ।
दुर्घटनामा मोटरसाइकल पछाडि सवार ईश्वरपुर नगरपालिका–१२, घारिबथानका २७ वर्षीय भक्तबहादुर खड्काको घटनास्थमै मृत्यु भएको इलाका प्रहरी कार्यालय केशरगञ्जका प्रहरी निरीक्षक जनकराज ढुङ्गानाले जानकारी दिनुभयो । मृतक खड्काको शव पोष्टमार्टमका लागि जिल्ला अस्पताल मलङ्गवा पठाइएको प्रहरीले जनाएको छ ।
मोटरसाइकलका चालक घारिबथानकै २६ वर्षीय अरुण खड्का गम्भीर घाइते हुनुभएको छ । खड्कालाई लालबन्दीमा उपचार हुन नसकेपछि वीरगञ्ज रेफर गरिएको प्रहरी निरीक्षक ढुङ्गानाले बताउनुभयो ।
ढुङ्गानाका अनुसार मोटरसाइकलसँग ठोक्किएपछि बस पल्टिएको थियो । दुर्घटनामा बसमा सवार ४० जना यात्रुमध्ये १२ जना घाइते भएका छन् । घाइते सात जना उपचारपश्चात् डिस्चार्ज भइसकेका, चार जनाको लालबन्दीमै उपचार चलिरहेको र एक जनालाई थप उपचारका लागि सिराहातर्फ रेफर गरिएको प्रहरीले जनाएको छ ।
दुर्घटनापछि बसका चालक फरार भएका छन् । बसधनीले चालकलाई सम्पर्कमा ल्याउने बताएका प्रहरी निरीक्षक ढुङ्गानाले बताउनुभएको छ ।
प्रहरीले दुर्घटनामा परेको बस घटनास्थलबाट उठाएर शनिबार राती २ बजे बयलवासस्थित इलाका प्रहरी कार्यालय केशरगञ्ज लगेको छ ।
