अध्यक्ष व्यस्त भएपछि एमाले स्थायी कमिटी बैठक स्थगित

प्रमुख प्रतिपक्षी दल नेकपा (एमाले) को स्थायी कमिटी बैठक साढे ३ बजेसम्मका लागि स्थगित भएको छ । बिहान ११ बजे सुरु भएको बैठक दिउँसो २ बजेपछि साढे ३ बजेसम्मका लागि स्थगित भएको सचिव पृथ्वीसुब्बा गुरुङले जानकारी दिनुभयो ।

शिक्षामन्त्री र जर्मनीका राजदूतबीच भेटवार्ता

शिक्षा, विज्ञान तथा प्रविधि मन्त्री देवेन्द्र पौडेल र जर्मनका राजदूत डा. थोमस प्रिन्जबीच भेटवार्ता भएको छ । मंगलबार मन्त्रालयमा भएको भेटवार्तामा उहाँहरुबीच विज्ञान तथा प्रविधिको विकास, वातावरणीय असन्तुलन, नविकरणीय ऊर्जाको विकास एवम् उत्पादनको विषयमा छलफल भएको हो ।

एमाले स्थायी कमिटी बैठकमा दशौं महाधिवेशनबारे छलफल हुँदै

प्रमुख प्रतिपक्षी दल नेकपा एमालेको स्थायी कमिटीको बैठकमा दशौं राष्ट्रिय महाधिवेशनबारे छलफल हुने जनाइएको छ । मंसिर १० देखि १२ गतेसम्म चितवनमा आयोजना हुन गइरहेको दशौं मशाधिवेशनमा दुई हजारभन्दा बढी महाधिवेशन प्रतिनिधिहरु सहभागी हुँदैछन् ।

सर्वोच्चमा आज दश इजलासमा ५९२ मुद्दामा पेशी

सर्वोच्च अदालतका प्रधानन्यायाधीश चोलेन्द्र शम्शेर जबराले मंगलबारका लागि १० इजलास तोक्नुभएको छ । प्रधानन्यायाधीश जबराले आजका लागि एक एकलसहित नौ संयुक्त इजलास तोक्नुभएको छ । दश इजलासमा ५९२ मुद्दामा पेशी तोकिएको सर्वोच्चले जनाएको छ ।

अधिकांश क्षेत्रमा मतदान

नेपाली काँग्रेसको १४औँ महाधिवेशनअन्तर्गत सोमबार सुरु भएको प्रतिनिधि सभा निर्वाचन क्षेत्रको अधिवेशनमा अधिकांश ठाउँमा मतदानबाटै नयाँ नेतृत्व चयन हुने भएको छ । नेपाली काँग्रेस केन्द्रीय निर्वाचन समितिका संयोजक वरिष्ठ अधिवक्ता महादेवप्रसाद यादवका अनुसार ६० जिल्लाका १४८ प्रतिनिधि सभा निर्वाचन क्षेत्रको अधिवेशनले मतदानबाटै नेतृत्व छान्ने गरी मतदान सुरु भएको जानकारी दिनुभयो ।