रोकिराखेको बसमा आगलागी

ललितपुर महानगरपालिका–१३ सिँचाइ हिटीस्थित रोकिराखेको दुई वटा बसमा आज बिहान आगलागी भएको छ । महानगरीय प्रहरी वृत्त सातदोबाटोका प्रहरी नायव उपरीक्षक गौतम मिश्रका अनुसार बिहान १०ः५५ बजेको समयमा एक्कासी गाडीमा आगलागी भएपछि दमकलको सहयोगमा स्थानीय र प्रहरीले आगो निभाएका थिए ।

पश्चिमी वायुको प्रभावले मौसममा बदली

पश्चिमी वायुको प्रभावले मुलुकभरको मौसममा सामान्यदेखि पूर्णबदली आएकाले देशका केही स्थानमा हल्का वर्षाको सम्भावनासमेत रहेको मौसम पूर्वानुमान महाशाखाले जनाएको छ । आज देशभर सामान्य बदली रही मध्य र पूर्वका थोरै स्थानमा र पश्चिमका एक दुई स्थानमा हल्का वर्षा हुने सम्भावना रहेको छ ।

तस्करीमा प्रयोग गरिएका मोटरसाइकल बरामद

सर्लाही प्रहरीले अवैध सामान ओसारपसारमा प्रयोग गरिएका २० वटा मोटरसाइकल बरामद गरी भन्सारमा बुझाएको छ ।

पोखरीमा डुबेर बालिकाको मृत्यु

पोखरीमा नुहाउने क्रममा डुबेर सप्तरीमा एक बालिकाको मृत्यु भएको छ । जिल्लाको कञ्चनरुप नगरपालिका ४ निवासी दिलीप परियारकी ११ वर्षीया छोरी डल्ली भनिने यासिकाको पोखरीमा डुबेर मृत्यु भएको इलाका प्रहरी कार्यालय कञ्चनपुरका प्रहरी नायब उपरीक्षक मकेन्द्र मिश्रले जानकारी दिनुभयो ।

मलेशियामा एक नेपालीको मृत्यु

रोजगारीका लागि मलेशिया जानुभएका दाङका एक व्यक्तिको मृत्यु भएको छ । शान्तिनगर गाउँपालिका–२ बाघमारे निवासी ४२ वर्षीय मोहन केसी (कान्छो) को असोज २९ गते नेपाली समयअनुसार बेलुका ४ः३० बजेतिर मृत्यु भएको हो ।