जानु पाण्डे
कपिलवस्तु पुस २५ गते । नेकपा (एमाले) कपिलवस्तुको अधिवेशनबाट जिल्ला अध्यक्षमा डम्मर शर्मा निर्वाचित हुनुभएको छ । शीर्षनेताले पदाधिकारी र केही सदस्य पदमा सर्वसम्मत नेतृत्व चयन गर्न नसकेपछि शनिबार दिउँसो ४ बजेपछि निर्वाचन भएको हो ।
निर्वाचित शर्माले २ सय ३८ मत प्राप्त गर्दा प्रतिद्वन्द्वी बाबुराम खनालले १ सय ८६ र नेत्रराज अधिकारीले सय मत ल्याउनुभएको मुख्य निर्वाचन अधिकृत चन्द्रबहादुर कार्कीले बताउनुभयो ।
उपाध्यक्षमा विश्रामप्रसाद चौधरी निर्वाचित हुनुभएको छ भने सचिवमा चन्द्रबहादुर गहतराजले विश्व कार्कीलाई २ मतको अन्तरले पराजित गर्नुभयो । सचिव पदमा गहतराजले १ सय ७८ मत प्राप्त गर्दा कार्कीले १ सय ७६ र भेषराज पाण्डेले १ सय ६० मत पाउनुभएको हो ।
यसैगरी सहसचिवमा लुम्बिनी प्रदेशसभा सदस्य अर्जुनबहादुर केसी र सुशीला दर्लामी निर्वाचित हुनुभएको छ । कुल ५ सय ५२ प्रतिनिधिमध्ये ५ सय २७ मत खसेको निवर्तमान जिल्ला अध्यक्ष झविलाल पोख्रेलले जानकारी दिनुभयो ।
