सभामुखमाथिको दुष्प्रचार खेदजनक छ : सचिवालय

सभामुख अग्निप्रसाद सापकोटाको नाम जोडेर भ्रम सिर्जना गरिएको भन्दै उहाँको सचिवालयले आपत्ति जनाएको छ । जिम्मेवार राजनीतिक दलको लेटरहेडमा उहाँले बोल्नै नबोलेको विषयमा काल्पनिक कथ्य बनाएर गलत भाष्य निर्माण गर्न खोजिएको भन्दै सचिवालयले ध्यानाकर्षण भएको जनाएको हो । सभामुख सापकोटाका प्रेस विज्ञ श्रीधर न्यौपानेले प्रेस नोट सार्वजनिक गर्दै सचिवालयको ध्यानाकर्षण भएको उल्लेख गर्नुभएको हो ।

माओवादी केन्द्रीय समिति बैठक शुक्रबार बस्ने

नेकपा (माओवादी) केन्द्रको केन्द्रीय समिति बैठक शुक्रबार बस्ने भएको छ । माओवादी केन्द्रका केन्द्रीय कार्यालयका सचिव श्रीराम ढकालले फागुन २० गते बिहान ११ बजेका लागि केन्द्रीय समितिको बैठक बोलाइएको जानकारी दिनुभयो ।

प्रतिनिधिसभा बैठकको कार्यसूची सार्वजनिक

तिनिधिसभा बैठकको कार्यसूची सार्वजनिक भएको छ। संघीय संसदका महासचिव डा. भरतराज गौतमले बुधबारको प्रतिनिधिसभा बैठकको कार्यसूची सार्वजनिक गर्नुभएको हो। बुधबार दिउँसो १ बजे बस्ने बैठकमा प्रधानमन्त्री शेरबहादुर देउवाले राष्ट्रिय सूचना आयोगका वार्षिक प्रतिवेदन पेश गर्नुहुनेछ। महासचिव डा. गौतमका अनुसार दोस्रो कार्यसूचीमा संस्कृति, पर्यटन तथा नागरिक उड्डयन मन्त्री प्रेम आलेले दुई वटा प्रस्ताव पेश गर्नुहुनेछ।

कैलाली काँग्रेस सभापति : दोस्रो चरणको निर्वाचन फागुन १९ गते

नेपाली काङ्ग्रेस कैलालीको सभापति चयनका लागि दोस्रो चरणको निर्वाचन फागुन १९ गते हुने भएको छ। पहिलो चरणको निर्वाचनबाट सभापतिका उम्मेदवारले ५० प्रतिशतभन्दा बढी मत ल्याउन नसकेपछि काँग्रेसको विधान अनुसार दोस्रो चरणको निर्वाचन हुन लागेको हो। सभापतिका उम्मेदवार प्रकाश बमले एक हजार १६९ मत र निकटतम् प्रतिद्वन्द्वी नारायणदत्त भट्टले एक हजार ७२ मत प्राप्त गर्नुभयो।

काँग्रेस सिन्धुलीको सभापतिमा पोख्रेल निर्वाचित

नेपाली काँग्रेस सिन्धुलीको जिल्ला सभापतिमा उपेन्द्रकुमार पोख्रेल निर्वाचित हुनु भएको छ। नेपाली काँग्रेसको १४ औँ महाधिवेशन अन्तर्गत सोमबार सम्पन्न दोस्रो चरणको निर्वाचनमा पोख्रेलले उज्ज्वल बराललाई ४१० मतको अन्तरले पराजित गर्नुभएको हो।