खाँदबारी, वैशाख ११ गते । राष्ट्रियसभा सदस्य तथा विधायन व्यवस्थापन समितिका सभापति पर्शुराममेघी गुरुङले कोरोना भाइरस परीक्षणका लागि १२ थान थर्मल गन सहयोग गर्नुभएको छ । सङ्खुवासभामा कोरोना भाइरस परीक्षणका लागि ज्वरो मापन गर्ने थर्मल गन अभाव भएपछि जिल्ला समन्वय समितिका प्रमुख सुमन शाक्यले सांसद गुरुङसँग थर्मल गन माग गर्नुभएको थियो ।
रेडियोबाट एसइई तयारी कक्षा
मकालु गाउँपालिकाले रेडियोमार्फत एसइई तयारी कक्षा शुरु गरेको छ । देशभर शुरु हुनलागेको एसइई परीक्षा स्थगन भएपछि अन्योलमा रहेका विद्यार्थीलाई गाउँपालिकाले रेडियो साङ्ग्रिलामार्फत पढाइ शुरु गरेको हो ।
गाउँपालिका र रेडियो साङ्ग्रिलाको सहकार्यमा आइतबारदेखि रेडियोमार्फत एसइई तयारी कक्षा शुरु गरेको गाउँपालिका अध्यक्ष तेजबहादुर पोखरेलले जानकारी दिनुभयो । गाउँपालिकाले एसइई दिने विद्यार्थीका लागि तीन घण्टाको तयारी कक्षा शुरु गरेको हो । रेडियो साङ्ग्रिलाले बिहान ७ देखि ९ बजेसम्म र बेलुका ५ देखि ६ बजेसम्म तयारी कक्षा शुरु गरेको अध्यक्ष पोखरेलले बताउनुभयो ।
गाउँपालिकाका शिक्षा शाखा प्रमुख नवराज ढुङ्गाना, शिक्षक पूर्णबहादुर तामाङ र चन्द्रशेखर चौधरीले एसइई तयारी सञ्चालन गर्ने गाउँपालिकाले जनाएको छ । एसइईका विद्यार्थीलाई गाउँपालिकाले अङ्ग्रेजी, गणित र विज्ञान विषयको कक्षा शुरु गरेको छ ।
