सर्लाही, माघ १६ गते । पूर्व–पश्चिम राजमार्गस्थित सर्लाहीको ईश्वरपुर नगरपालिका–१२, सागरनाथ चोकमा वुधवार राती बोलेरोको ठक्करबाट मोटरसाइकलमा सवार एक युवकको मृत्यु भएको छ । दुर्घटनामा अर्का एक युवक गम्भीर घाईते भएका छन् ।
बर्दिवासबाट लालबन्दीतर्फ आउँदै गरेको बा ३३ प १५४५ नम्वरको मोटरसाइकललाई विपरीत दिशाबाट जाँदै गरेको ना २ च ७२४१ नम्वरको बोलेरो गाडीले ठक्कर दिँदा लालबन्दी नगरपालिका–५, का २२ वर्षीय आशिष वैधको मृत्यु भएको हो । दुवै खुट्टामा गहिरो चोट लागी घाईते वैधको उपचारका क्रममा बिहिवार बिहान सबा १ बजे धुलिखेल अस्पताल काभे्रमा मृत्यु भएको प्रहरीले जनाएको छ ।
दुर्घटनामा गम्भीर घाईते मोटरसाइकलमै सवार लालबन्दी नगरपालिका–१३, का २३ वर्षीय विजय घिसिङको उपचार भइरहेको छ । दुर्घटनामा संलग्न बोलेरो र त्यसका चालक महोत्तरीको बर्दिवास नगरपालिका–२, का २६ वर्षीय आशिष परियार प्रहरीको नियन्त्रणमा छन् ।
यस्तै सर्लाहीको रामनगर गाउँपालिका–३, स्थित भित्री सडकमा वुधवार राती मोटरसाइकलको ठक्करबाट एक बालक गम्भीर घाईते भएका छन् । बाटोमा हिँडिरहेका बेला बीआर ३० एन ०६०२ नम्वरको मोटरसाइकलले ठक्कर दिँदा घाईते स्थानीय रामऔतार दासका पाँच वर्षीय छोरा आजित दासको न्यूरो अस्पताल वीरगञ्जमा उपचार भइरहेको छ ।
