धीरेन्द्रप्रसाद साह
राजविराज, फागुन २२ गते । नेपाल विद्युत प्राधिकरण वितरण केन्द्र राजविराजबाट खटिएको विद्युत् चुहावट नियन्त्रण टोलीले बिहीबार आधा दर्जन मानिसलाई पक्राउ गरेको छ ।
टोलीले राजविराज नगरपालिका वार्ड नं. १३ बस्ने विष्णु यादव, बलराम यादव, निरजकुमार यादव, वार्ड नं. १५ बस्ने उमेश मण्डल, बुधन दास र विष्णुपुर गाउँपालिका ७ बस्ने गंगछी मण्डललाई पक्राउ गरिएको वितरण केन्द्र राजविराजका प्रमुख इन्जिनियर अमोदकुमार यादवले जानकारी दिनुभयो । उनीहरुले अनाधिकृत रुपमा विद्युत् शक्ति प्रयोग गरिरहेको अवस्थामा पक्राउ गरिएको बताइएको छ । पक्राउ परेका उनीहरुलाई आवश्यक कारबाहीको लागि जिल्ला प्रहरी कार्यालय सप्तरीमा राखिएको छ ।
विद्युत् चुहावट नियन्त्रण टोली अनाधिकृत रुपमा विद्युत् शक्ति प्रयोग गरिरहेको अवस्थामा विभिन्न विद्युतीय सामग्रीहरु पनि बरामद गरिएको छ । टोलीले टिभी एक थान, सिटी चार्जन तीन थान र मिटर पाँच थान बरामद गरिएको प्रमुख यादवले बताउनुभयो । ति सामग्रीहरु कारबाहीको लागि प्राधिकरणको कार्यालयमा राखिएको छ । चुहावट नियन्त्रण टोलीमा नेपाल प्रहरी र प्राधिकरणका कर्मचारीहरु खटिएको थियो ।
