बनेपा, जेठ १८ गते । बन्दाबन्दीकै बीचमा पनि निरन्तररूपमा काम गरेको उपभोक्ता समितिले नमोबुद्ध नगरपालिकाको दाप्चा क्षेत्रको आठ किलोमिटर सडक स्तरोन्नति कार्य सम्पन्न गरेको छ । बाग्मती प्रदेश सरकारबाट प्राप्त ५० लाख रुपियाँ बजेटबाट शुरु गरेको सडक स्तरोन्नतिको काम नगरको वडा नं ७, ८, ९, १०, ११ र १ जोड्ने श्यामपाटी–काउसे–दारेगौँडा–भकुण्डे सडकखण्डको आठ किलोमिटर सडक तोकिएको समयभन्दा करिब एक महिनाअघि नै सम्पन्न गरेको सडक स्तरोन्नति उपभोक्ता समितिका अध्यक्ष टीकाबहादुर तामाङ (धावा)ले बताउनुभयो ।
“हामीले योजना सम्झौता भएको समयभन्दा करिब एक महिनाअघि नै त्यो पनि कम लागतमा तोकिएको मापदण्डअनुसारकै काम सम्पन्न गरेका छौँ”, तामाङले भन्नुभयो, “उपभोक्ता समितिले गरेको काममा भ्रष्टाचार, ढिलासुस्ती, नराम्रो र समयमा कहिल्यै गर्दैन भन्ने आम जनमानसको बुझाइलाई गलत सावित गर्दै हामीले जिल्लाकै नमूना काम गरेर देखाएका छौँ ।” यसअघिको साढे तीन मिटरको फराकिलो सडकलाई बढाएर अहिले आठ मिटरको बनाएको छ ।
काम सम्पन्न भएसँगै सम्बन्धित वडाका वडाध्यक्ष, जनसमुदाय र उपभोक्ता समितिबीच सार्वजनिक सुनुवाइ गरी काममा लागेको खर्च विवरण प्रस्तुत गरिएको छ । सडक स्तरोन्नति भएपछि अब त्यहाँका किसानलाई आफ्नो बारीमा उत्पादित तरकारी तथा फलफूल आफ्नै घरआँगनबाट बजारसम्म पुर्याएर आर्थिक उपार्जनमा सहज हुने भएको छ ।
सडकको स्तरोन्नति भएसँगै अब छिट्टै कालोपत्र (पक्की) गर्न नगरसभाबाट दुई करोड रुपियाँ बजेट विनियोजन भइसकेको उपभोक्ता समितिका अध्यक्ष तामाङले बताउनुभयो । काम सम्पन्न भएपछि भकुण्डे–नौबिसे–पुजारी टापु–दारेगौँडा–सिमपानी छाप–काउसे–नमोबुद्ध–पनौती–ललितपुरको लुभु हुँदै ग्वार्को जान निकै सजिलो हुने भएको छ ।
