सन्तोष राउत
सोलुखुम्बु, भदौ २३ गते । सोलुखुम्बुको सोलुदूधकुण्ड नगरपालिका–८ जन्तरधापमा स्थित चाँगेस्थान मन्दिरमा रहेको मूर्ति चोर्ने एक जनालाई प्रहरीले पक्राउ गरेको छ ।
मन्दिरको एक जोडी सिंहको मूर्ति, मूर्ति राख्ने एकजोडी बैठक, चाँदीको तीन खण्डे थाली, चाँदीको त्रिशुल र सिक्का भेटी रकम चोरी गर्ने सोलुखुम्बुको सोलुदूधकुण्ड नगरपालिका–८ बागमका ३५ वर्षिय रमेश मगरलाई पक्राउ गरिएको जिल्ला प्रहरी कार्यालय सोलुखुम्बुका प्रहरी निरीक्षक मनिदप चौहानले जानकारी दिनुभयो ।
दिउँसो हुस्सु लागेको समयमा यही सोमबार करिब साढे १२ बजे मूर्ति चोरी गरी छिमेकी जिल्ला ओखलढुङ्गा बजारमा बेच्न लाग्दा विशेष सूचनाका आधारमा राती पक्राउ गरिएको हो ।
चोरी गरिएका सबै सामान प्रहरीले बरामद गरेको र चोरी गर्नु व्यक्तिलाई प्रहरीले नियन्त्रणमा लिई कानूनी कार्वाहीका लागि अनुसन्धान प्रक्रिया अघि बढाइएको प्रहरी निरीक्षक चौहानले बताउनुभयो ।
