कल्याणपुर, फागुन ३ गते । सोमबार ट्याक्टर दुर्घटना हुँदा घाइते भएका सप्तरीका एक युवाको मङ्गलबार मृत्यु भएको छ। सप्तरीको डाक्नेश्वरी नगरपालिका ९ स्थित महुकीमा स १ त ६१०८ नम्बरको ट्याक्टर दुर्घटना हुँदा छिन्नमस्ता गाउँपालिका–३ का ३७ वर्षीय सन्तोष सदाको मृत्यु भएको हो ।
रड लोड गरेर अर्नाहाबाट पत्थरगाढातर्फ जाँदै गरेको ट्याक्टर डाक्नेश्वरी नगरपालिकाको महुकीमा अनियन्त्रित भएर दुर्घटना भएको थियो।
उपचारकै क्रममा मङ्गलबार सदाको मृत्यु भएको र दुर्घटनामा घाइते भएका छिन्नमस्ता गाउँपालिका ३ का २९ वर्षीय श्रीप्रसाद मण्डल र १८ वर्षीय युवराज सदाको राजविराजस्थित गजेन्द्रनारायण सिंह अस्पतालमा उपचार भइरहेको जिल्ला प्रहरी कार्यालय सप्तरीले जनाएको छ।
