जब हाकिमहरू नै कोट फुकालेर काममा जुटे... (फोटो फिचरसहित)

अमृतप्रसाद पौडेल
बेनी, साउन १० गते । म्याग्दीमा बाढीको वितण्डापछि अवरुद्ध भएका सडक तथा पुल मर्मतमा अहिले जनप्रतिनिधि तथा सुरक्षा निकायका प्रमुखहरू नै खटिरहेका छन् । बेनी–जोमसोम सडक खण्डको गलेश्वनजिकै रहेको राहुघाट खोलाले बेलिब्रिजको एकापट्टिको बिम गत असार २६ गते राहुघाट खोलाले भत्काएपछि सडक अवरुद्ध भएको छ । उक्त पुल सञ्चालनका लागि जिल्लाका जनप्रतिनिधि, पत्रकार, प्रमुख जिल्ला अधिकारी, प्रहरी प्रमुखलगायतको टोलीले शुक्रबारदेखि श्रमदान गरिरहेका छन् ।

पुल सञ्चालन गर्न दिउँसो १२ः३० बाट श्रमदान गरिरहेका थिए करिब ४० जनाले । त्यत्तिकैमा दिउँसो १ बजेतिर शिरमा ढाका टोपी, सर्ट पाइन्ट अनि कोटमा सजिएर आएका एक व्यक्ति कोट फुकालेर आफ्ना सहयोगीलाई दिनुभयो, अनि शुरु गर्नुभयो ढुङ्गा उचाल्न ।

सेना, प्रहरी तथा सशस्त्रका टोली खटिरहेकै ठाउँमा हातमा हात मिलाएर लामबद्ध भएर ढुङ्गा पास गरिरहेको लाममा घुस्नुभयो उहाँ । उहाँ अरु कोही नभएर जिल्ला समन्वय समिति म्याग्दीका प्रमुख देवेन्द्रबहादुर के.सी. हुनुहुन्थ्यो । जिल्लाका सुरक्षा निकाय तथा पत्रकारसमेत उक्त श्रमदानमा भिड्नुभयो ।

उत्तरी म्याग्दीको अन्नपूर्ण गाउँपालिकामा बाढी पहिरोबाट भएको क्षति र पीडितहरूलाई प्रत्यक्ष भेटघाटका लागि पुग्नुभएका के.सी. पुल निर्मणका लागि श्रमदान गर्नका लागि कार्यक्रम छोट्याएर फर्केको बताउनुहुन्छ । उहाँले नेपाली सेना, सशस्त्र प्रहरी, नेपाल प्रहरीसहितको टोलीसँगै ढुङ्गा उचाल्न थाल्नुभयो ।

ग्याभिन जाली भर्नका लागि ढुङगा उठाउँदै पास गर्दै गरेपछि केही बेर आराम गर्न बस्नुभएका के.सी.ले भन्नुभयो, ‘आफ्नो जिल्लाभित्रको क्षेत्र अनि जनताको प्रत्यक्ष जनजीविकासँग जोडिएको कारणले गर्दा नै यसमा मेरो पनि केही भए पनि योगदान होस् भन्ने लाग्यो । सीडीओ साब पनि आउनुभएको थियो अनि मैले पनि आफ्नोतर्फबाट केही भए पनि सहयोग होस भन्नका लागि नै श्रमदान गरेको हुँ ।’ संयोजक के.सीले भन्नुभयो ।

नेपाल पत्रकार महासङ्घ, म्याग्दी शाखाका निवर्तमान अध्यक्ष सुतर के.सी. पनि नेपाल रेडक्रस सोसाइटीको ज्याकेट लगाएर दिनभर ग्याभिन भर्नमा व्यस्त हुनुभयो । कलम समात्ने हात भनेर चिनिने पत्रकार पनि जनताले पाएको सास्ती सहन नसकी दिनभर पुल उठाउनका लागि ग्याभिन भर्नमा ढुङ्गा उचाल्दै जाली भर्नका लागि सहयोगमै श्रमदान गर्नुभयो ।

के.सी. भन्नुहुन्छ, ‘पत्रकारको काम सूचना दिने त हो नै, त्यसमाथि हामी मानव हौँ र हामीमा मानवीयता पनि छ । त्यसैले उत्तरी म्याग्दी र मुस्ताङका बासिन्दाका लागि खाद्यान्न ढुवानी अवरुद्ध भएको यो पुल मर्मत गर्दा उहाँहरूलाई सहज हुने हेतुले म खटेको हुँ ।’

शुक्रबार बिहान सदरमुकाम बेनीदेखि प्रमुख जिल्ला अधिकारी ज्ञाननाथ ढकालको नेतृत्वमा पुल उठाउन ग्याभिन जाली भर्ने टोली थियो । जिल्लामा रहेका तीन सयभन्दा धेरै प्रहरीलाई काम गर्नका लागि निर्देशन दिने जिल्ला प्रहरी कार्यालय म्याग्दीका डिएसपी किरणजङ्ग कुँवर आफ्नै सिपाहीलाई हौसला दिँदै उसैसँग काममा खट्नुभयो । डीएसपी कुँवरले नै प्रहरीको नेतृत्व गर्नुभएको थियो । सशस्त्र प्रहरीका इन्सपेक्टर पुरन न्यौपानेले सशस्त्र एवम् नेपाली सेनाका जमदार विष्णु कार्की नेपाली सेनाको नेतृत्व लिएर कार्यस्थलमा पुग्नुभएको थियो ।

शुक्रबार दिनभरमा ३० थान ग्याभिन जाली भरियो भालि नेकपाका युवा राष्ट्रिय युवा सङ्घ र नेपाली काँग्रेसका युवाहरू तरुण दलका युवा पनि खट्ने भनेर जानकारी दिएका छन्, प्रजिअ ढकालले भन्नुभयो । ढकालले थप्नुभयो, 'गत असार २५ गतेदेखि अवरुद्ध पश्चिम म्याग्दीको बेनी–दरवाङ सडक बुधबार बेलुकादेखि सञ्चालनमा आएपछि अब बेनी जोमसोम सडकका लागि खटेको छु ।' प्रजिअ ढकालले आफैँ प्रहरी तथा सेनाका जवानहरूसँगै हातमा हात मिलाएर ग्याभिन भर्नमा खट्दा जवानहरू पनि उत्साहसाथ काममा खट्ने गरेका छन् ।