सिराज खान
नेपालगञ्ज, साउन २२ गते । पछिलो समयमा बाँकेमा कोभिड-१९ सङ्क्रमित बढ्ने क्रम निरन्तर जारी छ । भेरी अस्पताल नेपालगञ्जमा गरिएको पीसीआर परीक्षणमा बिहीबार बाँकेका थप २८ जनामा कोरोना भाइरस सङ्क्रमण पुष्टि भएको छ । योसँगै बाँकेमा सङ्क्रमितको सङ्ख्या ४९८ पुगेको छ ।
बाँकेका प्रमुख जिल्ला अधिकारी रामबहादुर कुरुम्बाङले पछिल्लो २४ घण्टामा गरिएको परीक्षणमा नेपालगञ्ज र खजुराका गरेर २८ जनामा भाइरस सङ्क्रमण पुष्टि भएको बताउनुभयो । यसरी सङ्क्रमित हुनेहरूमा सबै जना समुदायमा नै घुलमिल गरेर बसेका सर्वसाधारण रहेको उहाँले बताउनुभयो । बिहीबार सङ्क्रमित पुष्टि भएकामध्ये १६ जना पुरुष र १२ जना महिला रहेका छन् ।
प्रमुख जिल्ला अधिकारी कुरुम्बाङले सङ्क्रमितहरूमा २५ जना नेपालगञ्जका र तीन जना खजुराका रहेको बताउनुभयो ।
बाँकेमा पछिल्लो समयमा प्रहरी, कर्मचारी, कैदी र बजारका पसलेलगायतमा सङ्क्रमण देखिन थालेको छ । स्वास्थ्य कार्यालय बाँकेका कोरोना सम्पर्क व्यक्ति नरेश श्रेष्ठले समुदायमा रहेकाहरूमा सङ्क्रमण देखिएपछि उनीहरूको सम्पर्कमा आएकाहरूको नमुना परीक्षण गर्दा बिहीबार थप २८ जनामा सङ्क्रमण देखिएको बताउनुभयो । नेपालगञ्जमा मात्रै पछिल्लो एक सातामा करिब एक सय जना सङ्क्रमित थपिएपछि नेपालगञ्जको अवस्था निकै गम्भीर बन्दैगएको बताउनुभयो ।
निषेधाज्ञा उल्लङ्घन गर्ने २५ लाई पक्राउ गरेर क्वारेन्टाइन पठाइयो
नेपालगञ्जमा समुदायमै सङ्क्रमण तीव्र गतिमा बढ्दैगएपछि सो नियन्त्रणका लागि लगाइएको निषेधाज्ञाको पनि व्यापक उल्लङ्घन गरिएको पाइएको छ । निषेधाज्ञाको पालना नगरिएको गुनासो आएपछि बिहीबार बाँकेका प्रमुख जिल्ला अधिकारी रामबहादुर कुरुम्बाङ र प्रहरी प्रमुख एसपी ओमबहादुर राना आफैँ सडकमा निस्कनुभयो ।
जिल्लाका सुरक्षा प्रमुखहरू सडकमा निस्केपछि निषेधाज्ञा उल्लङ्घन गर्ने २५ जनालाई पक्राउ गरेर क्वारेन्टाइन पठाइएको छ । उनीहरूलाई १४ दिनपछि मात्रै छाडिने प्रहरीले जनाएको छ ।
स्थानीय प्रशासनले पटक पटक सर्वसाधारणसँग निषेधाज्ञाको पालना गर्न आग्रह गरे पनि अटेर गर्ने गरेको पाइएको छ ।
