जनार्जन खत्री
सर्लाही, साउन २५ गते । सर्लाहीमा लकडाउनलाई सोमबारदेखि कडाइका साथ लागू गरिने भएको छ । कोरोना भाइरस (कोभिड–१९) को सङ्क्रमण रोकथाम तथा नियन्त्रणका लागि गठित ‘कोरोना क्राइसिस म्यानेजमेन्ट सेन्टर’ (सीसीएमसी) को आइतबार दिउँसो सदरमुकाम मलङ्गवामा बसेको बैठकले सोमबार बिहान ६ बजेदेखि लागू हुने गरी लकडाउनको कडाइका साथ पूर्ण कार्यान्वयन गर्ने निर्णय गरेको हो ।
परीक्षणको दायरा बढाइएसँगै मलङ्गवा, बरहथवा, ईश्वरपुर, लालबन्दीलगायत स्थानमा जनप्रतिनिधि, सञ्चारकर्मी, राष्ट्रसेवक कर्मचारी, स्वास्थ्यकर्मी र वित्तीय संस्थामा कार्यरत कर्मचारीमा सङ्क्रमण पाइएकाले समुदायस्तरमै सङ्क्रमण फैलिसकेको (सीसीएमसी) को बैठकले ठहर गरेको छ । यसै सन्दर्भलाई दृष्टिगट गर्दै कोरोनाको सङ्क्रमण समुदायस्तरमा थप हुन नदिन स्थानीय प्रशासन ऐन २०२८ तथा सङ्क्रामक रोग ऐन २०२० बमोजिम जारी लकडाउनमा सोमबारदेखि कडाइ गर्ने निर्णय भएको प्रमुख जिल्ला अधिकारी सुरेन्द्र पौडेलले जानकारी दिनुभयो ।
सर्लाहीमा साउन २१ देखि २७ गतेसम्मका लागि लकडाउन जारी छ । तर लकडाउनको पूर्ण कार्यान्वयन भने हुन सकेको छैन । सङ्क्रमित बढ्दै गएकाले २७ गतेपछि पनि पुनः लकडाउनको अवधि थपिने सम्भावना रहेको एक सुरक्षा अधिकारीले गोरखापत्रसँग बताउनुभएको छ । यस्तै, (सीसीएमसी) को आइतबारको बैठकले अबदेखि आरडीटी टेष्टमा पूर्ण रुपमा रोक लगाउने, क्वारेन्टिनमा बसेका व्यक्तिहरूको पाँचदेखि सात दिन पूरा भएपश्चात् अनिवार्य रुपमा पीसीआर टेष्ट गराउने निर्णय गरेको प्रजिअ पौडेलले बताउनुभयो ।
त्यसैगरी, भारतबाट जिल्ला प्रवेश गर्न खोज्ने व्यक्तिहरूलाई कडाइका साथ नियमन गर्ने, प्रवेश गरिसकेकालाई क्वारेन्टिनमा राखेर पीसीआर परीक्षणपश्चात् नेगेटिभ रिपोर्ट आएपछि मात्रै गन्तव्यमा पठाउने र सीमाबाट प्रवेश गरेकाहरूको सङ्ख्या विश्लेषणको आधारमा आवश्यक थप क्वारेन्टिनको व्यवस्था गर्न मलङ्गवा नगरपालिकालाई अनुरोध गर्ने निर्णय गरिएको छ ।
सर्लाहीमा कोरोना सङ्क्रमणबाट मलङ्गवाकी एक महिलाको उपचारका क्रममा काठमाडौँमा मृत्यु भएको छ भने ८१० जनामा सङ्क्रमण पाइएको छ ।
