नवराज कट्टेल
विराटनगर, भदौ २८ गते । विराटनगर महानगरपालिकाका प्रमुख प्रशासकीय अधिकृत ईन्द्रमणि पोखरेललाई कोरोना भाइरस ९कोभिड–१९० संक्रमण पोजेटिभ पुष्टि भएको छ । अधिकृत पोखरेलको शनिबार स्वाब संकलन गरेर परीक्षण गर्दा आइतबार रिपोर्ट पोजेटिभ आएको हो । विराटनगर महानगरपालिका जनस्वास्थ्य महाशाखा प्रमुख रमेश कार्कीले प्रमुख प्रशासकीय अधिकृत पोखरेललाई कोरोना पोजेटिभ देखिएको पुष्टि गर्नु भएको छ । पोखरेललाई संक्रमण पुष्टि भएपछि महानगरका अधिकांश कर्मचारी होम आइसोलेसनमा बसेका छन् ।
महानगरको अत्यावश्यक बाहेकका सेवा ५ दिन बन्द गर्ने निर्णय गरिएको छ । यसअघि विराटनगर–२ का वडाध्यक्ष कुमार पोखरेल र विराटनगर–५ का वडाध्यक्ष मीनकुमार आचार्यलाई कोरोना देखिएको थियो । महानगरपालिका सामान्वय प्रशासन महाशाखा प्रमुख अर्जुन थपलियाका अनुसार जनप्रतिनिधि र कर्मचारीको नेतृत्व गर्ने प्रमुख प्रशासकिय अधिकृतमा समेत कोरोना संक्रमण पोजेटिभ देखिएपछि असोज २ गतेसम्मलाई अत्यावश्यक बाहेकका सेवा बन्द गरिएको हो ।
महानगरले सार्वजानिक सूचना जारी गरेरै सेवा बन्द गर्ने जनाएको हो । विराटनगर २ का वडाध्यक्ष पोखरेललाई संक्रमण देखिनुअगाडि प्रशासकीय अधिकृत पोखरेल एउटै बैठकमा सहभागी हुनु भएको थियो । विराटनगरमा आइतबार ३८ जना नयाँ संक्रमित थपिएका छन् । विराटनगरमा आइतबारसम्म १ हजार ४०२ जना संक्रमित पुगेका हुन् । जसमध्ये १७ जनाको मृत्यु भएको छ भने ३५० जना संक्रमणमुक्त भएका छन् ।
आइतबार मोरङमा ४१, खोटाङ, उदयपुर र झापा १–१ र प्रदेश १ बाहिरका २ जना रहेको सामाजिक विकास मन्त्रालयले जनाएको छ । मन्त्रालयका अनुसार विराटनगरमा १८ महिला र २० जनाको रिपोर्ट पोजेटिभ आएको छ । मोरङको धनपालथानमा २ पुरुष, कटहरीमा १ पुरुष, खोटाङको साकेला गाउँपालिकामा १ पुरुष, उदयपुरको स्थानीय तह नखुलेका १ पुरुष, झापाको शिवसताक्षीमा १ महिला र प्रदेश १ बाहिरका १ महिला र १ पुरुषको रिपोर्ट पोजेटिभ आएको हो ।
प्रदेश १ मा कोरोना संक्रमितको संख्या ४ हजार ७४२ पुगेको छ । प्रदेश १ मा आइतबार ७ जना डिस्चार्ज भएका छन् । उनीहरु सबै मेची अस्पताल झापाबाट डिस्चार्ज भएका हुन । प्रदेश १ मा डिस्चार्ज हुनेको संख्या २ हजार ६३ पुगेको छ ।सामाजिक विकास मन्त्रालयका अनुसार हाल सम्म १ लाख ७ हजार ५३३ जनाको पीसीआर परीक्षण गरिएको छ ।
