ज्येष्ठ नागरिकलाई सम्मान

धनुषाको मिथिला नगरपालिका १ लक्ष्मिनिवासले वडाभित्रका ज्येष्ठ नागरिक, एकल महिला र अपाङ्गता भएकालाई सम्मानित गरेको छ । वडाले विपत्त व्यवस्थापन कार्यक्रमअन्तर्गत ज्येष्ठ नागरिक, एकल महिला र अपाङ्गता भएका गरी पाँचसय जनालाई सोमबार एक कार्यक्रमबीच सम्मानित गरेको हो ।

सांसद गुप्तासहित धेरै कार्यकर्ता एमालेमा प्रवेश

संघीय सांसद वृजेशकुमार गुप्ता नेकपा (एमाले) प्रवेश गर्नुभएको छ । स्वतन्त्र समूहबाट ‘सूर्य’ चिन्ह लिएर कपिलवस्तु क्षेत्र २ बाट निर्वाचित गुप्ता सोमवार एमाले प्रवेश गर्नुभएको हो । कपिलवस्तु नगरपालिका तौलिहवामा आयोजित वृहत् सभा तथा पार्टी प्रवेश कार्यक्रममा सांसद गुप्ताका धेरै समर्थक नेता कार्यकर्ता एमाले प्रवेश गर्नुभएको छ । उहाँलाई एमाले अध्यक्ष केपी शर्मा ओलीले प्रवेश गराउनुभयो ।

ज्येष्ठ नागरिकको भवनमा नगरपालिका कार्यालय सञ्चालन

सर्लाहीको लालबन्दी नगरपालिका –८, मा निर्माण गरिएको ज्येष्ठ नागरिक भवनमा नगरपालिका कार्यालय राखिएको छ । सहाराविहीन ज्येष्ठ नागरिकलाई संरक्षण दिएर राख्ने उद्देश्यले निर्माण गरिएको सो भवनमा नगरपालिकाको कार्यालय राखिएको हो ।

विद्यालयमा ‘एक विद्यालय एक नर्स’ कार्यक्रम

कपिलवस्तुको महाराजगन्ज नगरपालिका २ वगिहवास्थित दुर्गा भवानी कन्या माध्यमिक विद्यालयमा अध्ययनरत विद्यार्थी अघिल्लो वर्ष रजस्वला हुँदा पीडा भोगेको स्मरण गर्नुहुन्छ । रजस्वला हुँदा उहाँहरुलाई तल्लो पेट दुख्ने, टाउको दुख्ने थकान महसुस हुनेजस्ता समस्या हुनेगरेको थियो । छात्रा मात्र अध्ययन गर्ने विद्यालयमा लुम्बिनी प्रदेश सरकारले नर्सको व्यवस्था गरेपछि छात्राहरु लाभान्वित भएका हुन् ।

धादिङ उद्योग वाणिज्य संघमा थपलिया

धादिङ उद्योग वाणिज्य संघको १० औं अधिवेशनबाट अध्यक्षमा विष्णुप्रसाद थपलिया निर्विरोध चयन हुनुभएको छ । धादिङबेसीमा सम्पन्न अधिवेशनले थपलियाको अध्यक्षतामा २१ सदस्य समिति निर्विरोध चयन गरेको हो ।