सबै सङक्रमित निको भएपछि हट स्पट बनेको नरैनापुर कोरोनामुक्त

केही दिनअघि कोरोनाको हट स्पट बनेको बाँकेको नरैनापुर गाउँपालिकाका सबै सङ्क्रमित निको भएर घर फर्किएका छन् । सबै सङ्क्रमित निको भएर घर फर्किएपछि पालिका कोरोनामुक्त बनेको छ । बाँकेका प्रमुख जिल्ला अधिकारी रामबहादुर कुरुम्बागंका अनुसार नरैनापुर गाउँपालिकामा सङ्क्रमित भएका ११८ जना मध्ये एक जनाको मृत्यु भएको थियो भने बाँकी सङ्क्रमित देखिएका सबै ११७ जना निको भएर घर फर्किएका छन् ।

कञ्चनरुप नगरपालिकाका २७८ मुसहर परिवारलाई राहत

लामो लकडाउनको कारण खाद्यान्न अभाव भाेगिरहेका सप्तरीको कन्चनरुप नगरपालिका वडा नम्बर १, ४ र १० का २७८ मुसहर र डोम परिवारलाई राहत वितरण गरेको छ। कोरोना भाइरस (कोभिड–१९)का कारण जारी लकडाउनको मारमा रहेको मुसहर र डोम समुदायलाई दलित सरोकार मञ्च नेपाल कञ्चनरुप नगरपालिका–८ ले शुक्रबार राहत वितरण गरेको हो ।

गल्याङ बजार एक हप्ताका लागि बन्द

कोरोनाको महामारीमा सङ्क्रमणको जोखिम कम गर्न गल्याङ बजार एक हप्ताका लागि बन्द गरिएको छ । गल्याङ नगरपालि काले सरोकारवालाहरुसँग समन्वय गरी शनिबारबाट अत्यावश्यक बाहेक सम्पूर्ण बन्द गरेको नगरपालिका प्रमुख भुपराज अधिकारीले जानकारी दिनुभयो । उहाँले कोरोना सङ्क्रमण समुदाय स्तरमा फैलिएपछि बजार बन्द गर्ने निर्णय गरेको बताउनुभयो ।

बाजुराको क्वारेन्टाइनमा एक युवकको मृत्यु

बाजुराको बडिमालिका नगरपालिकाको क्वारेन्टाइनमा बसेका एक युवकको मृत्यु भएको छ । बडिमालिका नगरपालिकाको वडा नं –२ को सत्यवादी विद्यालयमा रहेको क्वारेन्टाइनमा ४५ वर्षीय युवकको मृत्यु भएको हो ।

भारतमा सङ्क्रमित हुने तीन लाख नाघ्यो

भारतीय स्वास्थ्य मन्त्रलायका अनुसार भारतमा कोरोना सङ्क्रमितको संख्या तीन लाख आठ हजार ९९३ पुगेको छ । संयुक्त राज्य अमेरिका, रुस र ब्राजिल तीन लाख सङ्क्रमित भएका राष्ट्र हुन । तीनवटै राष्ट्रको अपेक्षा भारतको जनसंख्या अत्याधिक बढी रहेको छ ।