लमजुङमा ८९ प्रतिशत नागरिकले पूर्ण खोप लगाए

लमजुङमा ८९ प्रतिशत नागरिकले कोरोना भाइरस (कोभिड १९) विरुद्धको पूर्ण खोप लगाएका छन् । १८ वर्ष माथिका ९९ हजार ९ जना नागरिकलाई पूर्ण मात्राको खोप लगाउने लक्ष्य रहेकोमा ८८ हजार ३ सय ८३ अर्थात ८९ प्रतिशत नागरिकलाई पूर्ण खोप वितरण गरिएको स्वास्थ्य कार्यालय लमजुङले जनाएको छ ।

कोभिड विरामी आउन छाडेपछि खाली भए आइसोलेसन बेड

सिन्धुली जिल्लामा कोरोना सङक्रमणका बिरामीको उपचारका लागि विरामी आउन छाडेपछि वनाइएका आइसोलेसन बेड खाली भएका छन् । जिल्लाका नौ वटै स्थानीय तहमा गरी कुल ११७ वटा आईसोलेसन बेड पहिलो लहरको कोरोना सङक्रमणकाबेला बनाइएकोमा अहिले सबै बेड खाली भएको जिल्ला स्वास्थ्य कार्यालय सिन्धुलीले जनाएको छ ।

दैलेख अस्पतालमा सेवा विस्तार तर जनशक्ति अभाव

जिल्ला अस्पताल दैलेखले अस्पताल स्तरोन्नतिसँगै गुणस्तरीय सेवा दिन थाले पनि जनशक्तिको अभाव रहेको बताएको छ । कोरोना महामारीबीच सीमित स्रोत र साधनका भरमा पनि उत्कृष्ट व्यवस्थापन गर्दैआएको अस्पतालले दावी गरेको छ ।

ललितपुरमा फाइजर खोपको दोस्रो डोज लगाउन सुरु

ललितपुर महानगरपालिकाले कोभिड–१९ विरुद्धको फाइजर खोपको दोस्रो डोज लगाउन सुरु गरेको छ । महानगरपालिकाले सूचना जारी गर्दै कात्तिक २८ गतेदेखि मङ्सिर ११ गतेसम्म फाइजर बायोनटेकको पहिलो डोज लगाएकालाई मङ्सिर २७ गतेदेखि पुस ५ गतेसम्म दोस्रो डोज लगाउने जनाएको छ।

थप २२९ जनामा सङ्क्रमण पुष्टि, दुईको मृत्यु

पछिल्लो २४ घण्टामा २२९ जना कोरोना भाइरसका सङ्क्रमित थपिएका छन् । नौ हजार ३९२ जनामा आरटीपीसीआर परीक्षण गरिएकोमा २२९जनामा कोरोना सङ्क्रमण पुष्टि भएको स्वास्थ्य तथा जनसङ्ख्या मन्त्रालयले जनाएको छ ।