कम्बोडियाले आफ्नो ६८ औं स्वतन्त्रता दिवस मनायो

कम्बोडियाले मङ्गलबार ६८ औं स्वतन्त्रता दिवस मनाएको छ । राजधानी नोम पेन्हको स्वतन्त्रता स्मारकमा एक घण्टा लामो समारोहसहित उक्त स्वतन्त्रता दिवस मनाएको समाचारमा जनाइएको छ । राजा नोरोडोम सिहामोनी र प्रधानमन्त्री सम्देच टेको हुनसेन सयुक्त रुपमा स्वतन्त्रता स्मारकमा माल्यार्पण गरी दीप प्रज्वलन गर्नु भएको थियो ।

मलेसियाका प्रधानमन्त्री इन्डोनेसिया जाने

मलेसियाका प्रधानमन्त्री स्माइल साब्री याकोबले इन्डोनेसियाको भ्रमण गर्नुहुने भएको छ । मलेसियाको विदेश मन्त्रालयले दिएको जानकारीअनुसार मङ्गलवार र बुधबार उहाँले इन्डोनेसियाको भ्रमण गर्नुहुने भएको हो । गत अगस्टमा प्रधानमन्त्रीको जिम्मेबारी सम्हालेपछि उहाँको यो पहिलो छिमेकी देशको भ्रमण भएको अधिकारीहरुले जनाएका छन् ।

भारतमा नौ महिनापछिकै सबैभन्दा कम सङ्क्रमित

भारतमा कोरोनाभाइरसबाट दैनिक सङ्क्रमितहरुको सङ्ख्या नौ महिना पछिकै सबभन्दा कम देखिएको छ । सरकारी अधिकारीहरुले मंगलबार दिएको जानकारीअनुसार पछिल्लो एक दिनमा १० हजार १२६ जना मात्रै नयाँ सङ्क्रमित थपिएका हुन ।

अफगान सरकारद्वारा पोलियो खोप अभियान सुरु

अफगानिस्तानको सरकारले देशबाट पोलियो उन्मुलन गर्न बालबालिकालाई पोलियो थोपा खुवाउने कार्यक्रमको सुरुवात गरेको छ । अफगानिस्तानको सार्वजनिक स्वास्थ्य मन्त्रालयले सोमबारबाट सो कार्यक्रमको सुरुवात गरेको यहाँका एक स्वास्थ्य अधिकारीहरुले जनाएका छन् । ती अधिकारीले उक्त कार्यक्रमलाई देशव्यापी बनाइने जानकारी पनि गराएका छन् ।

इराकी प्रधानमन्त्रीको हत्या प्रयासको राष्ट्रसंघद्वारा निन्दा

इराकी प्रधानमन्त्री मुस्ताफा अल कादिमीको हत्या प्रयासको संयुक्त राष्ट्रसंघले निन्दा गरेको छ । राष्ट्रसंघीय सुरक्षा परिषदले सो हत्या प्रयासको कडा शब्दमा निन्दा गरेको हो । गत आइतबार इराकी प्रधानमन्त्री कादिमीको निवासमा ड्रोन हमला भएको थियो । प्रधानमन्त्रीलाई हत्या गर्ने उद्देश्यले ड्रोन हमला गरिएको अनुमान गरिएको छ ।