सविता शर्मा
काठमाडौँ, माघ १६ गते । राष्ट्रिय सभाअन्तर्गत विभिन्न समितिमा पदाधिकारी हेरफेर हुनसक्ने भएको छ । राष्ट्रिय सभामा हालै नयाँ सदस्य निर्वाचित भएर आएपछि समितिका सभापति र सदस्यहरू हेरफेर हुनसक्ने भएको हो ।
राष्ट्रिय सभा सदस्यमा नवनिर्वाचित सदस्यहरूको कार्यकाल आउँदो फागुन २१ गतेदेखि सुरु हँुदैछ । निर्वाचित १८ र मनोनीत एक जना गरी १९ जना राष्ट्रिय सभा सदस्यको कार्यकाल सुरु भएसँगै समितिमा सभापति र सदस्यहरूको हेरफेर हुनेछ ।
राष्ट्रिय सभा नियमावली, २०७५ मा यस्तो हेरफेरसम्बन्धी व्यवस्था गरिएको छ । प्रत्येक समितिको कार्यावधि दुई वर्षको हुने व्यवस्था गरिएको छ । समितिको कार्याविधि समाप्त भएमा समितिको सभापति पद रिक्त हुने व्यवस्थासमेत नियमावलीमा गरिएको छ ।
सङ्घीय संसद् सचिवालयका सहायक प्रवक्ता दशरथ धमलाले प्रत्येक दुई वर्षमा नयाँ सदस्यहरू आउने व्यवस्था भएको हुँदा नयाँ आउने सदस्यहरूको व्यवस्थापनका लागि यस्तो व्यवस्था गरिएको बताउनुभयो । उहाँले सभापतिबाहेक अन्य सदस्यको कुनै पनि बेला समिति हेरफेर हुनसक्ने जानकारी दिनुभयो । आवश्यकता र मागका आधारमा सदस्यहरूको हेरफेर हुने व्यवस्था रहेको छ । यसको अधिकार अध्यक्षमा सुरक्षित रहन्छ ।
सम्बन्धित सदस्यले कुनै पनि समितिमा काम गर्न इच्छा व्यक्त गर्न सक्ने र कुनै संसदीय दलले सदस्यलाई कुन समितिमा रहँदा प्रभावकारी हुनसक्छ भन्ने आधारमा फेरबदल हुनसक्ने व्यवस्था रहेको छ । धमलाले भन्नुभयो, “संसदीय दलमार्फत अध्यक्ष समक्ष सिफारिस भइआएमा अध्यक्षले हेरफेर गरी सभामा सुनाउनुहुन्छ । ”
सङ्घीय संसद्को स्थायी सदनको रूपमा रहेको राष्ट्रिय सभामा ५९ जना सदस्य रहने व्यवस्था छ । प्रत्येक प्रदेशबाट कम्तीमा तीन जना महिला, एक जना दलित र एक जना अपाङ्गता भएका व्यक्ति वा अल्पसङ्ख्यकसहित आठ जना गरी निर्वाचित ५६ र नेपाल सरकारको सिफारिसमा राष्ट्रपतिबाट मनोनित कम्तीमा एक जना महिलासहित तीन जना गरी ५९ जना सदस्य छन् । राष्ट्रिय सभामा एक तिहाइ सदस्यको पदावधि प्रत्येक दुई वर्षमा समाप्त हुने व्यवस्था छ ।
राष्ट्रिय सभामा चारवटा समिति छन् । दिगो विकास तथा सुशासन, विधायन व्यवस्थापन, प्रत्यायोजित विधायन व्यवस्थापन तथा सरकारी आश्वासन र राष्ट्रिय सरोकार तथा समन्वय समिति छन् । अहिले दिगो विकास तथा सुशासन समितिमा १४ जना, विधायन व्यवस्थापन समितिमा १४, प्रत्यायोजित विधायन व्यवस्थापन तथा सरकारी आश्वासन समितिमा १३ र
राष्ट्रिय सरोकार तथा समन्वय समितिमा १४ जना सदस्य रहनुभएको छ ।
राष्ट्रिय सभाका नयाँ सदस्यहरूमा इन्दिरादेवी गौतम, गोपीबहादुर सार्की अछामी, देवेन्द्र दाहाल, तुलसाकुमारी दाहाल, राधेश्याम पासवान, शेखरकुमार सिंह, मृगेन्द्रकुमार सिंह यादव, गङ्गाकुमारी बेलबासे, बेदुराम भुसाल, भगवती न्यौपाने, नारायणकाजी श्रेष्ठ, विमला घिमिरे, जगप्रसाद शर्मा, गोपाल भटृराई, सुमित्रा बीसी, मायाप्रसाद शर्मा, शारदादेवी भट्ट र तारामान स्वाँर निर्वाचित हुनुभएको छ ।
