सरोज ढुंगेल
भक्तपुर,फागुन ५ गते । सोमबार भक्तपुरको खरिपाटीस्थित क्वारेन्टाइनमा पुग्दा रमाइलो दृष्य देखिन्थ्यो । क्वारेनटाइनमा बसेकाहरुको तीन टोली छत माथि बसेर क्यारमबोर्ड खेलिरहेका देखिन्थे । काेही लुँडो, काेही ब्याडमिन्टन समेत खेलिरहेका थिए । कोभिड–१९ (कोरोना भाइरस) को प्रकोप फैलिएको चीनको बुहानबाट उद्दार गरी ल्याइएका नेपालीको दैनिकी खेलकूदमा बितिरहेको छ ।
उनीहरुको दैनिकी सहज होस् भन्ने उद्देस्यले सरकारले इन्टरनेट, टेलिभिजन, विभिन्न खेलकुदका सामग्रीहरुको व्यवस्था समेत गरिदिएको छ ।
क्वारेनटाइनमा बस्ने नेपालीहरुले आफूले सोचेभन्दा पनि धेरै राम्रो व्यवस्थापन गरेकोमा सरकारको प्रशंसा गरीरहेका छन् । सरकारले विभिन्न क्षेत्रका मानिसलाई क्वारेनटाइन व्यवस्थापनमा खटाएको छ । स्वास्थ्य क्षेत्रमा नेपाली सेनाका चिकित्सक डा. नविन फुँयालको नेवृत्वमा टोली खटाइरहेको छ । डा. फुँयालले गोरखापत्रसँग कुरा गर्दै भन्नुभयो, स्वास्थ्य क्षेत्रबाट गर्नुपर्ने सम्र्पूण व्यवस्थापन गरिएको छ ।
उहाँले क्वारेनटाइनमा बस्ने १७५ जना स्वस्थ रहेको जानकारी दिँदै सुरक्षाको दृष्टिकोणबाट मात्र राखिएको बताउनुभयो । डा. फुँयालले खाना, बस्न, खेलकूद, मनोरञ्जन, इन्टरनेटको समेत व्यवस्था गरिएको बताउनुभयो । उहाँहरुलाई कुनै किसिमको कमी भएको महशुस हुन दिएका छैनांै,डा. फुयालले भन्नुभयो,स्थानीयबासीलाई बिरामी नै ल्याएको हो कि जस्तो लागेको छ, यो भ्रमलाई सञ्चार जगतबाट चिर्नु जरुरी छ ।
डा. फुँयालले त्यहाँ रहेका सम्र्पूण नेपाली स्वस्थ रहेको बताउनुभयो । अहिले खकारको परीक्षणको लागि टेकु पठाइएको भन्दै उहाँले बुधबार उक्त रिपोर्ट आइसक्ने जानकारी दिनुभयो । अहिलेसम्म कुनै पनि नेपालीलाई रुघाखोकी, ज्वरोजस्ता कुनै पनि समस्या नदेखिएकोले आइसोलेसनमा समेत जानु नपरेको बताउनुभयो ।
सोमबार दिउँसो नै भक्तपुर जिल्ला प्रशासन कार्यालयकी प्रमुख जिल्ला अधिकारी होमकला भण्डारी, नेपाल प्रहरीका भक्तपुर प्रमुख (एसपी) सविन प्रधान, सशस्त्र प्रहरीका प्रमुख एसपी विश्वकुमार भटराई र नेपाली सेनाका प्रमुख सेनानी तथा भक्तपुर जिल्लाका इञ्चार्ज शिव पौडेल क्वारेनटाइन स्थल खरिपाटी पुग्नुभइ त्यहाँ राखिएका नेपालीबारे जानकारी लिनुभएको थियो ।
गोरखापत्रसँग कुरा गर्दै प्रमुख जिल्ला अधिकारी होमकला भण्डारीले सरकारले सम्र्पूण व्यवस्थापन राम्रोसंँग गरेको बताउनुभयो । उहाँले स्थानीयसँग छलफल गरेर नै क्वारेनटाइनको व्यवस्था गरेको उल्लेख गर्दै सुरु सुरुमा भने नबुझेको कारण विरोध गरेको जानकारी दिनुभयो ।
सर्वपक्षीय बैठक बसेर नै क्वारेनटाइनको निक्यौल गरेको उल्लेख गर्दै भण्डारीले चीनबाट आएका नेपालीको बसोबासमा कुनै पनि समस्या नरहेको जानकारी दिनुभयो । प्रमुख जिल्ला अधिकारी भण्डारीले नेपाली सेना, सशस्त्र प्रहरी र जनपथ प्रहरीले सुरक्षा दिइरहेको बताउनुभयो ।
क्वारेनटाइनस्थल पुग्नुभएका अविभावक दिनेश श्रेष्ठले आफ्नो छोराछोरीका लागि सरकारले चीनबाट उद्दार गरेर ठूलो सहयोग गरेको भन्दै सरकारको प्रशंसा गर्नुभयो । उहाँले छोरी डा. श्रद्धा श्रेष्ठले चीनमा हुँदा मरिन्छ कि भन्ने लागेको बताउँदै कतिखेर नेपाल जाउँजस्तो भएको बताउनुभयो ।
उहाँले छोरीलाई चीनमा रहदा खान बस्न देखि अन्य विविधकारणले समस्या भएको भन्दै नेपाल आएपछि छोरी लगायत अन्य १७५ जनाले नयाँ जीवन पाएको अनुभूति भएको बताउनुभयो । चीनमा रहुँदा पानी खान नपाइने, खानाको सर्टेज भएको, मास्क लगायतका सामान नभएको, कति दिन भोकै बस्नुपरेको सुनाउँदै अहिले सरकारले व्यवस्था गरेको क्वारेनटाइनमा बस्दा पाँचतारे होटलमा बसेको जस्तो अनुभब गरेको बताउनुभयो ।
चीनमा स्यानेटरीको सामाग्रीदेखि खानेपानी, खानेकुराको समेत राम्रो व्यवस्था नहुँदा नेपाली डिप्रेशनमा जान लागेका थिए । डा. फुयालले आफन्तलाई भेट नदिएको अविभावकले ल्याएको खानेकुरा समेत नलिएको बताउनुभयो ।
