नागेन्द्रकुमार कर्ण
जलेश्वर, कात्तिक २७ गते । महोत्तरी जिल्लाको चारवटा ठाउँमा हुने उपनिर्वाचनको लागि उम्मेदवारी दर्ता सकिएको छ । मुख्य निर्वाचन अधिकृतको कार्यालय महोत्तरीले दिएको जानकारी अनुसार जिल्लाको पिपरा गाउँपालिका, मटिहानी नगरपालिका तथा बलवा नगरपालिकामा उपनिर्वाचनको लागि वुधबार उम्मेदवारी दर्ता गरिएको हो । पिपरा गाउँपालिकामा अध्यक्ष, मटिहानी नगरपालिका वडा नं. ६ मा वडाध्यक्ष तथा बलवा नगरपालिकाको वडा नं. २ र ८ मा वडाध्यक्षको उपनिर्वाचनको उम्मेदवारी दर्ता गरिएको हो ।
जनमत पार्टीकोे निर्वाचनमा पहिलो पटक उम्मेदवार मनोनयन
सिके राउत पार्टीको जनमत पार्टीले पहिलो चोटी निर्वाचनमा भाग लिन पिपरा तथा बलवामा आफ्नो उम्मेदवारी दर्ता गराएको छ । पिपरा गाउँपालिकामा अध्यक्ष पदको लागि अंजली देवी मण्डललाई उम्मेदवार बनाएको छ भने बलवा नगरपालिका वडा नं. २ मा वीरेन्द्रकुमार साह तथा वडा नं. ८ मा फुलकुमारी दास तत्मालाई उम्मेदवार बनाएर उम्मेदवारी दिइएको जनमत पार्टीका नेता संजयकुमार यादवले जानकारी दिन्ुभयो ।
मुख्य निर्वाचन अधिकृत विष्णु सुवेदीले शान्त र सहज वातावरणमा सबै ठाउँमा उम्मेदवारी दर्ता गरिएको जानकारी दिनुभयो । पिपरा गाउँपालिकामा अध्यक्ष पदको लागि ११ पार्टीले उम्मेदवारी दर्ता गराएका छन् भने ९ जना स्वतन्त्र उम्मेदवारहरुले उम्मेदवारी दर्ता गराएको छ ।
त्यसैगरी, मटिहानी नगरपालिकाको वडा नं. ६ मा छ जनाले उम्मेदवारी दर्ता गराएका हुन् । जसमा तीनवटा पार्टी र तीनजना स्वतन्त्रले उम्मेदवारी दिएका हुन् । त्यसैगरी, बलवा नगरपालिका वडा नं. २ मा आठ जना तथा वडा नं. ८ मा १२ जनाले उम्मेदवारी दर्ता गराएका छन् । जसमध्ये ५ पार्टीले उम्मेदवारी दर्ता गराएका छन् भने अन्यले स्वतन्त्र रुपमा उम्मेदवारी दर्ता गराएको मुख्य निर्वाचन अधिकृत सुवेदीले जानकारी दिनुभयो ।
पिपरा गाउँपालिकामा राष्ट्रिय जनता पार्टी नेपालबाट रविता चौधरी, नेपाल कम्युनिष्ट पार्टीबाट विक्रम चौधरी, नेपाली काँग्रेसबाट विजयकुमार यादव, समाजवादी फोरमबाट रामजानकी यादव, नेपाल लोकतान्त्रिक पार्टीबाट राजकिशोर यादवले उम्मेदवारी दर्ता गराएका हुन् । मटिहानी नगरपालिकामा नेकपाबाट जाकिर हुसैन, राजपाबाट रामबाबु नायकले उम्मेदवारी दर्ता गराएका छन् ।
बलवाको वडा नं. २ मा नेकपाबाट किसुनदेव साह र वडा नं. ८ मा लक्ष्मेश्वर यादवले उम्मेदवारी दर्ता गराएका छन् ।
यसक्षेत्रमा अहिले सबैको ध्यानाकर्षण पिपरा गाउँपालिका रहेकाले यहाँ प्रदेशस्तरका मन्त्रीहरुदेखि लिएर प्रदेश सांसद, विभिन्न नगरपालिका र गाउँपालिकाका प्रमुख, उपप्रमुखहरुको उपस्थिति रहेको थियो ।
