लहान, मङ्सिर ८ गते । यही मङ्सिर १४ गते हुने उपनिर्वाचनलाई दृष्टिगत गरी उपनिर्वाचन हुने सिरहा र सप्तरीका दुई स्थानमा आज नमूना मतदान गरिएको छ । समग्र विकास सेवा केन्द्रद्वारा आज सिरहाको कल्याणपुर नगरपालिका–१२ मा करिब २०० ले र सप्तरीको छिन्नमस्ता गाउँपालिका–७ मा १५० ले नमूना मतदान गरेका छन् ।
कल्याणपुर–१२ स्थित मावि परिसरमा आयोजना गरिएको नमूना मतदानको जिल्ला निर्वाचन कार्यालय सिरहाका प्रमुख इन्दिरा यादव, सिरहाका प्रमुख जिल्ला अधिकारी गोपालकुमार अधिकारीलगायतले निरीक्षण गर्नुभएको समग्र विकास केन्द्रका अरुणकुमार चौधरीले जानकारी दिनुभयो ।
यस्तै सप्तरीको छिन्नमस्ता–७ को नमूना मतदानको जिल्ला मुख्य निर्वाचन अधिकृत चन्द्रमणी ज्ञवाली, जिल्ला निर्वाचन कार्यालय सप्तरीका प्रमुख दिलीप यादवलगायतले निरीक्षण गर्नुभएको चौधरीले बताउनुभयो । अघिल्ला निर्वाचनहरुमा मत बदरको सङ्ख्या बढी देखिएकाले मतदाताहरुलाई सचेत बनाउन नमूना मतदान गराइएको चौधरीको भनाइ छ ।
२०८१ कार्तिक २१ बुधवार
