गोरखापत्र समाचारदाता
काठमाडौं, मङ्सिर १८ गते । सङ्घीय मामिला तथा सामान्य प्रशासन मन्त्रालयको चालू आर्थिक वर्षको पहिलो चौमासिकमा चार दशमलव १८ प्रतिशत मात्र वित्तीय प्रगति भएको छ ।
जसमा पुँजीगततर्फ सात दशमलव ७९ र चालूतर्फ दुई दशमलव ५२ प्रतिशत बजेट खर्च भएको जनाइएको छ । मङ्गलबार मन्त्रालयको पहिलो चौमासिक प्रगति समीक्षा कार्यक्रममा चार दशमलव १८ प्रतिशत मात्र वित्तीय प्रगति भएको जनाइएको हो ।
सरकारले बजेट निर्धारित समयभित्रै खर्च गर्न पटकपटक सबै मन्त्रालयलाई निर्देशन गरे पनि सङ्घीय मामिला तथा सामान्य प्रशासन मन्त्रालयको भने पहिलो चौमासिक सन्तोषजनक नभएको पाइएको छ । यस वर्ष मन्त्रालयको कुल ३१ अर्ब ८२ करोड ४२ लाख रुपियाँ रकम विनियोजित भएकोमा प्रथम चौमासिकमा एक अर्ब ३३ करोड तीन लाख रुपियाँ खर्च भएको मन्त्रालयले सार्वजनिक गरेको छ ।
कार्यक्रममा सङ्घीय मामिला तथा सामान्य प्रशासनमन्त्री हृदयेश त्रिपाठीले संविधानको मर्म सरकारको नीति, कार्यक्रम र योजनाअनुसार काम गर्न कर्मचारीलाई निर्देशन दिनुभयो । उहाँले यसै महिनाभित्र मन्त्रालय अन्तर्गतका कार्यालयको योजना, कार्यक्रम र खर्चको अवस्थाका बारेमा विस्तृत रूपमा छलफल गरी सुधार गर्दै जाने भन्दै निर्धारित समयसीमाभित्रै काम गर्न उहाँले सबै कर्मचारीलाई आग्रह गर्नुभयो ।
मन्त्रालयका सचिव यादवप्रसाद कोइरालाले तोकिएको काम तोकिएकै समयमा गर्न सबै मातहतका कर्मचारीलाई निर्देशन दिँदै सरकारको लक्ष्य हासिल गर्न तोकिएको काम तोकिएकै समयमा गर्नुपर्ने बताउनुभयो । मन्त्रालयको बेरुजु रकम १४ अर्ब ७१ करोड ७४ लाख ५३ हजार रहेकोमा चालू वर्षमा एक अर्ब १७ करोड ७३ लाख ९६ हजार रुपियाँ फरफारक भएको मन्त्रालयले जनाएको छ ।
मन्त्रालयले प्रथम चौमासिकमा पाँचवटा कानुन निर्माण गरी सङ्घीयता कार्यान्वयनमा सहजीकरण गरिएको मन्त्रालयका सहसचिव केदार पनेरूले बताउनुभयो ।
