प्यूठान समाचारदाता
प्यूठान, माघ २६ गते । प्रस्तावित प्यूठान स्वर्गद्वारी आन्तरिक विमानस्थल आयोजनाको विस्तृत परियोजना प्रतिवेदन (डीपीआर) तर्जुमाको काम सुरु भएको छ । डीपीआर निर्माणका लागि फिल्ड सर्भेको काम सकिएको छ ।
विमानस्थल निर्माणको प्रक्रियाअघि बढेपछि स्थानीयसहित जिल्लावासी उत्साहित भएका छन् । विमानस्थल निर्माणले जिल्लाको विकासको मुहार फेर्ने भन्दै जिल्लावासी उत्साहित बनेका हुन् । अब निर्माण अघि बढ्छ भन्ने लागेको छ, स्थानीय भोजराज खड्काले भन्नुभयो, “हामी सबै जग्गा दिनका लागि सकारात्मक भएका छौँ । आफ्नो क्षेत्रमा बन्न लागेको विमानस्थलले यस क्षेत्रको विकास गराउने उहाँको अपेक्षा छ ।
नेपाल नागरिक उड्डयन प्राधिकरणको तर्फबाट परामर्शदाता रियल प्याथ इन्जिनियरिङ कन्सल्टेन्सी प्रालिले डीपीआर तर्जुमाको काम गरिरहेको छ । कन्सलट्यान्टका इन्जिनियर उत्सव गौतमले फिल्ड सर्भेको काम सकिएको जानकारी दिनुभयो । ड्रोन प्रविधिबाट सर्भेको काम गर्दा छिटो सकिएको उहाँले बताउनुभयो ।
विमानस्थलको चार वर्षअघि फिल्ड सर्भे भएको थियो । स्वर्गद्वारी नगरपालिका ८, बर्जिवाङमा पर्ने चाल्नेटारमा विमानस्थल निर्माणका लागि यसअघि वातावरणीय प्रभाव मूल्याङ्कनसमेत गरिएको छ ।
मुख्यगरी, स्वर्गद्वारी आउने पर्यटकलाई लक्षित गरी विमानस्थलको निर्माणको काम अघि बढेको हो । यससँगै प्यूठान र रोल्पाका जनतालाई हवाई यातायातको पहुँच पुग्ने स्वर्गद्वारी नगरपालिकाका प्रमुख नेत्रबहादुर रोकायले बताउनुभयो । विमानस्थलले स्वर्गद्वारीको पर्यटन प्रवद्र्धनमा ठूलो मद्दत पुग्ने उहाँले विश्वास व्यक्त गर्नुभयो ।
आयोजनाको प्रस्तावित लागत ७७ करोड रुपियाँ रहेको छ । विमानस्थलका लागि ६०.७९ हेक्टर क्षेत्रफल आवश्यक पर्ने अध्ययनले देखाएको छ । आयोजना निर्माणले चाल्नेटारका १२ घरधुरी प्रत्यक्ष रूपमा विस्थापित हुनेछन् । आयोजना निर्माण गर्दा ५५.१८ हेक्टर राष्ट्रिय वनअन्तर्गतको हरियाली सामुदायिक वनको अधिग्रहण हुने देखिएको छ ।
