गोरखापत्र समाचारदाता
ललितपुर, माघ २७ गते । नेपाली कांग्रेसले बालुवाटारस्थित ललिता निवास जग्गा प्रकरण राजनीतिक पूर्वाग्रह र बदनियतले प्रेरित रहेको ठहर गर्दै यस्तो प्रतिशोधपूर्ण व्यवहारको राजनीतिकरुपले प्रतिवाद गर्ने निर्णय गरेको छ ।
पार्टी केन्द्रीय कार्यालय सानेपामा सोमबार बसेको केन्द्रीय कार्य समितिको बैठकले पार्टीका उपसभापति विजयकुमार गच्छदारमाथि नेपाल सरकारको प्रभाव र दबावमा अख्तियार दुरुपयोग अनुसन्धान आयोगले मुद्दा दायर गरेको आरोप पनि लगाएको छ ।
सभापति शेरबहादुर देउवाको अध्यक्षतामा बसेको बैठकले गरेको निर्णयमा भनिएको छ, “यो कार्य राजनीतिक पूर्वाग्रह र बदनियतले प्रेरित रहेको ठहर गर्दै बैठक घोर भत्र्सना र खेद व्यक्त गर्दछ तथा यस्तो प्रतिशोधपूर्ण व्यवहारको राजनीतिक रुपले प्रतिवाद गर्ने निर्णय गर्दछ ।”
कांग्रेसले अख्तियारले प्रस्तुत गरेको अभियोगपत्र आफैँमा विरोधाभाषपूर्ण एवम् दोहोरो मापदण्डयुक्त आरोप पनि लगाएको छ । यसै विषयलाई लिएर कांग्रेसले प्रतिनिधि सभाको बैठकसमेत अबरुद्ध गर्दै आएको छ ।
यसैगरी, बैठकले चीनको वुहान शहरमा रहेका नेपाली विद्यार्थीहरुसँगै सबै नेपालीलाई तत्काल उद्धार गरेर देश ल्याउन सरकारसमक्ष माग गरेको छ । बैठकको निर्णयमा भनिएको छ, “उद्धारमा हुने ढिलाइले बढ्न सक्ने संक्रमणको जोखिम र त्यसले भोलि नेपालमा पर्न सक्ने गम्भीर असर बारे बैठक सरकारलाई सजग गराउन चाहन्छ । देश फर्काएर राख्ने ‘क्वारेन्टाइन’ लाई सम्पूर्ण रुपले व्यवस्थित र सुरक्षित ढंगले प्रबन्ध गर्न पनि बैठक सरकारलाई विशेष रुपले सजग गराउँदछ ।”
पार्टीका मुख्य सचिव कृष्णप्रसाद पौडेलले जारी गर्नुभएको विज्ञप्तिमा नेपाल सरकारका पूर्व सचिव अर्जुन कार्कीको श्रीमती मुना कार्कीको हत्या भएको घटना र बैठकले अछाम पञ्चदेवल विनायक नगरपालिका वडा नं. २ का नेपाली कांग्रेसको तर्फबाट निर्वाचित वडा अध्यक्ष पदमबहादुर धामीको हत्यालाई बैठकले गम्भीरतापूर्वक लिएको उल्लेख छ । अर्को बैठक माघ २९ गते पुनः बस्नेछ ।
२०८२ भाद्र १४ शनिवार
